ജീവിതത്തിന്റെ സംഗീതം

കാട്ടരുവിയിൽ നീന്തും
നാട്ടുവെളിച്ചത്തിൻ  
കൈപിടിക്കുവാൻ
കൈകോർത്തു  വന്നു
 
നിശ്ശബ്ദരായ് നാം
ഏറുമാടത്തിലേറി  
കാട്ടുപക്ഷികൾക്കൊപ്പം
കാട്ടുരാവിൻ കാലൊച്ചകൾ കേട്ടു

ഉറക്കം പോയവഴിയിലൂടൊരു
കടുവ പാഞ്ഞുപോയി
ഉണർവ്വിലി ലിരുന്നൊരു  
കൂമൻ മൂളിമൂളിപ്പറന്നു

ഉണ്ണുവാൻ തുടങ്ങവേ 
ഉറുമ്പുകൾ വന്നു ഭിക്ഷ ചോദിച്ചു
രാക്കിളികൾ നമുക്കു കാവലായ്
പാട്ടുകൊണ്ടൊരു കോട്ടയുണ്ടാക്കി

കാടുനമുക്കിരുളും മരങ്ങളും
ചേർത്തൊരു കൂടു പണിതു
ജീവിതത്തിന്റെ സംഗീതം
പുതച്ചു കിടക്കാൻ പറഞ്ഞു