പാട്ട്

പാട്ട്
.......
ഒരു പാട്ടിലെ ആദ്യത്തെ
രണ്ടു വരിയാണ് നമ്മൾ
പുല്ലുകൾ തലയാട്ടിയും
മഴത്തുള്ളികൾ താഴേക്ക് ചാടിയും
കേട്ടു നിന്ന പാട്ട്

വയൽ വരമ്പിലൂടെ
സ്കൂളിലേക്ക് ഓടിപ്പോയ
പാട്ട്
അതിനെത്രയോ വരികളുണ്ടായിരുന്നു
മാന്തണലതു പാടിയിരുന്നു
കാക്കപ്പൂവുകൾ കണ്ണെഴുതുമ്പോൾ
തുമ്പപ്പൂക്കളതു കേട്ടിരുന്നു
ഇപ്പോഴുമതു കേൾക്കുന്നു
നേർത്ത തേങ്ങൽ പോലെ കേൾക്കുന്നു
ഞാനുമേട്ടനുമതു കേട്ടു നിന്നു
രണ്ടു വരികളായ്
ഒരേ താളത്തിൽ നിന്നു
അതിനെ പിന്തുടർന്നു നടന്നു
പഴയവീട്ടിലെ പിച്ചകപ്പടർപ്പിൽ
മഞ്ഞമന്ദാരത്തിന്നിതളിൽ
അതിൻ്റെ അവസാന വരികൾ
തീരുവാനാകാതെയൊഴുകുന്നതു കണ്ടു
ഇപ്പോഴുമതു കേൾക്കുന്നു
അമ്മ പാടുമ്പോലെ ,
മണ്ണിനടിയിൽ നിന്ന്.
- മുനീർ അഗ്രഗാമി