മൗനത്തിൻ്റേയും മനസ്സിൻ്റേയും ഭാഷ

മൗനത്തിൻ്റേയും
മനസ്സിൻ്റേയും ഭാഷ
*********************
മൗനത്തിൻ്റേയും
മനസ്സിൻ്റേയും ഭാഷ ഒന്നു തന്നെ.
മിണ്ടാനുള്ളതെല്ലാം
മിണ്ടിക്കഴിഞ്ഞ
അപാരതയായ് മൗനം
പ്രപഞ്ചം പോലെ നിന്നു.

എന്നാൽ ഇനി മിണ്ടാനുള്ളതെല്ലാം
വന്നു വിങ്ങുന്ന
അനന്തതയായ് മൗനം
അതിനെ പൊതിഞ്ഞു
അതിനുള്ളിൽ
സമുദ്രത്തിൽ മീനെന്ന പോലെ
എണ്ണാനും അളക്കാനുമാവാതെ
മനസ്സ് അതിൻ്റെ ഭാഷയിൽ
നീന്തിക്കൊണ്ടിരുന്നു
മൗനത്തിൻ്റേയും
മനസ്സിൻ്റേയും തീരത്തിരുന്ന്
നീയതു പഠിക്കുക
ഉദയവും അസ്തമയവും
അതിനിടയിലെ തിളക്കങ്ങളും
വായിക്കുക
മറ്റൊന്നിനുമല്ല ,
തമ്മിലറിയാൻ മാത്രം.
- മുനീർ അഗ്രഗാമി