ണ - മുനീർ ‍ അഗ്രഗാമി

 ണ

===

മുനീർ ‍ അഗ്രഗാമി

--------------------

ണ രണ്ടു കാലുള്ള ആനയാണ്

പ്രണയത്തിൻറെ നടുക്കത്

നഗ്നമായി നിൽക്കുന്നു

മരണത്തിൻറെ ഒടുക്കം

ഒരു കണ്ണീർത്തുള്ളിക്കൊപ്പവും

അതിൻറെ കൊമ്പുകളെവിടെയെന്ന് സംശയം തോന്നാം

പ്രണയത്തിൽ നിൽക്കുമ്പോൾ

ഏതു കൊമ്പനാണ്

കൊമ്പുകൾ പുറത്തെടുത്തിട്ടുള്ളത് ?

മരണത്തിൽ കിടക്കുമ്പോൾ

ഏതു വീരനാണ് കൊമ്പുകൾ പുറത്തുകാണിക്കാനാവുക?

ഓരോരോ വാക്കിലും

അതിനോരോ ഭാവമാണ്

നാണയത്തിൽ അത് നിവർന്നു നിൽക്കുന്നു

പണയത്തിൽ തലകുനിച്ചും

ന യെ പോലെ മലർന്നു കിടന്നാലോ

സ യെപോലെ തിരിഞ്ഞു കിടന്നാലോ

അതിനു മറ്റൊരു സാധ്യതയില്ല

അതുകൊണ്ട് താൻ താമസിക്കുന്ന വാക്കിൽ

അർത്ഥമോർത്ത് ണ നിസ്സഹായനായി നിൽക്കുന്നു

കണ്ണീരിൽ അത് നില തെറ്റാതിരിക്കാൻ

തന്‍റെ തന്നെ ആനപ്പുറത്ത് കയറുന്നു

നുണയിൽ അത് തന്നെത്തന്നെ നുണയുന്നു

നോക്കൂ

തന്റെ തുമ്പികൈയ്യിൽ

എത്ര സൂക്ഷ്മതയോടെയാണ്

വാക്കിൻറെ സത്തയെ അത്

ചുരുട്ടിപ്പിടിച്ചിരിക്കുന്നത് !

ണയുടെ കാലിനിടയിലൂടെ

ഞാൻ ഭാഷയിലേക്ക് നൂണു കടക്കുന്നു;

ഭാഷ എന്നിലേക്കും

**********

മാതൃഭൂമി ആഴ്ചപ്പതിപ്പ്