ആ തീരം ഇന്നില്ല

അതെവിടെപ്പോയ് ?

കാണാതായത്

ഒരു സായന്തനത്തിൽ

നാം പ്രണയം വരച്ചു ചേർത്ത

ചിത്രം

അന്നത്തെ ആനന്ദത്തിൽ

കാലിടിയിൽ നിന്ന്

മണ്ണ് ആരോ മാന്തുന്നത്

നാമറിഞ്ഞില്ല എന്നത്

ഇന്നാരോടു പറയും?

അന്ന് നാം സംസാരിച്ച ഒരു തിര

ഇന്ന് നമ്മെ തിരഞ്ഞിവിടെ വന്നാൽ

നാമെന്തു ചെയ്യും ?

നിൽക്കാൻ തീരമില്ലാത്ത

ഒരു പ്രതിസന്ധിയിൽ.

കരകാണാത്ത ഒരാധിയിൽ.

ആ തീരം

മുങ്ങി മരിച്ചു പോയ ഒരാളെ പോലെ

ജലത്തിൽ ഇപ്പോഴും ഇളകുന്നുണ്ടാകുമോ ?

മണ്ണിലും മണലിലും

നിൽക്കാത്ത ഒരാൾ

ആ ഇളക്കമെങ്ങനെ കാണും ?

- മുനീർ അഗ്രഗാമി

18Shukkoor Mampad, Dhanya Liji and 16 others