വറ്റിപ്പോയ ഉറവയിൽ
.................................................
വറ്റിപ്പോയ ഉറവയിൽ താമസിക്കുവാൻ
ഒരു ഭാഗ്യം വേണം
എന്നോ അതിൽ നീന്തിയ മീനിന്റെ
ഭാവത്തിൽ ഉറവയെ
ഇപ്പോഴുമറിയാൻ കഴിയണം
ഇഴഞ്ഞു പോയ പാട്
ഓർമ്മിപ്പിക്കുന്ന കാര്യങ്ങൾ
സാകൂതം കേൾക്കുവാനാകണം
ഒറ്റപ്പെട്ട ഒരാൾക്ക്
അതിനു കഴിയും
ഉടലും ഉള്ളും തഴുകി ഒഴുകിയ
എല്ലാ നനവുകളും വറ്റിപ്പോയ
ഒരു കല്ലാണല്ലോ അയാൾ
ഒറ്റയ്ക്കു നിൽക്കുമ്പോൾ
അയാളുടെ മിനുസത്തിൽ നോക്കി
എന്തൊക്കെ വായിക്കാം!
- മുനീർ അഗ്രഗാമി
No comments:
Post a Comment