നീലകണ്ഠൻ

 നീലകണ്ഠൻ

.......................

കഴുത്തിൽ

ഒരു നീല മറുകുണ്ട്

നിന്റെ വിരൽ പച്ചകുത്തിയത്.

ലോകത്തെ രക്ഷിക്കാനായിരുന്നില്ല

ഞാൻ കയ്പ്പുകുടിക്കാൻ മുതിർന്നത്

അതിജീവനത്തിനു വേണ്ടിയായിരുന്നു

നീ വന്നപ്പോൾ

അതിറക്കാൻ

നീ സമ്മതിച്ചില്ല

ഒപ്പം ചേർന്ന്

ഒപ്പം നടന്ന്

എന്നിൽ പ്രവേശിച്ചു.

എന്റെ പാതിയായി

പാതിരകൾ കടക്കുമ്പോൾ

നീ ഞാനായിത്തീർന്നു

പകലുകൾ പിന്നിടുമ്പോൾ

ഞാൻ നീയായിത്തീർന്നു

ഉടലുന്നുച്ചിയിൽ

ഇപ്പോൾ മഞ്ഞിന്റെ

ചില വരകൾ

ഉടലിൽ കാലം കൈലാസം

പച്ചകുത്തുകയാണ്

ഹിമഗിരിയിൽ നാം വസിച്ചിട്ടില്ല

അതുകൊണ്ടാവാം

അത് നമ്മിൽ വാസമുറപ്പിക്കാൻ

പതിയെ നടന്നു വരുന്നത് .

ഏതു ചൂടിലും

നാമിരിക്കുന്ന തണുപ്പ്

അതാണ് .

- മുനീർ അഗ്രഗാമി