സമാധിയായ രണ്ടു പേർ സംസാരിക്കുന്നു
......................................................................
ദൂരത്തെ തകർത്ത ചുവടുകൾ
ചരിത്രമായ നിമിഷത്തിൽ
നാം തൊട്ടടുത്ത് നിന്നു
അവസാനത്തെ അദ്ധ്യായത്തിനു മുമ്പ്
വർണ്ണം
വർഗ്ഗം
ഭാഷ
ജാതി എന്നിവ
എഴുതിത്തീർത്തു
അവസാനത്തെ അദ്ധ്യായത്തിൽ
സന്തോഷത്തിലിരുന്ന്
സമാധിയായി
നാം നിന്നസ്ഥലമല്ലാതെ
മറ്റെവിടെയുമല്ല
വിശുദ്ധം
അവിടെ പുതിയവരാരും എത്തുന്നില്ല
ചരിത്ര പുസ്തകം തുറക്കുന്നില്ല
മറിച്ച്
നാം നടന്ന വഴി പിന്നിലേക്ക് നടന്ന്
ഖനനം നടത്തുന്നു
നോക്കൂ
തകർത്ത ദൂരത്തിന്റെ
കഷണങ്ങളുമായ്
അവർ വരുന്നു
ഫോസിലുകൾ ചേർത്ത്
ദൂരത്തെ അവർ
പുനർപ്രതിഷ്ഠിക്കുകയാണ്
അവർക്ക് ചുവടുകളില്ല
ചലനങ്ങൾ മാത്രം.
- മുനീർ അഗ്രഗാമി
No comments:
Post a Comment