കന്നിവോട്ട്

കന്നിവോട്ട്

....................

ആദ്യത്തെ വോട്ട്

ആദ്യത്തെ പ്രണയം പോലെ

ഇങ്ങോട്ടു വന്ന്

ചൂണ്ടുവിരൽ നീട്ടാൻ പറഞ്ഞു

അത്ര എളുപ്പം മായാത്ത

ഒരു ചുംബനം തന്നു

ഞാൻ രാജ്യത്തിന്റെ ഉടലിന്റെ

ഒരംശമാണെന്ന്

ആദ്യമായിത്തോന്നിയത്

അന്നാണ്

എൽപി സ്കൂളിലെ ബൂത്തിൽ നിന്നും

അത്രയും സ്വകാര്യമായി ചെയ്ത

ആദ്യത്തെ

രാഷ്ട്രീയ പ്രവർത്തനം

ഒരാളോട് ചേർന്നു നിൽക്കുക

എന്നതായിരുന്നു.

അയാൾ ഒരു ചിഹ്നമായിത്തീർന്ന

ആശയമായിരുന്നു;

ആശയമായിത്തീർന്ന

ജനതയായിരുന്നു;

ജനതയായിത്തീർന്ന

നിലപാടായിരുന്നു

എന്നെ മറ്റൊരാൾക്ക് ആവശ്യമുണ്ടെന്ന

പ്രഖ്യാപനമായിരുന്നു

ആദ്യത്തെ വോട്ട്

ആദ്യത്തെ രതി പോലെ

മറവി കീഴടക്കാത്ത

ഒരു ദേശമാണ്

കൂട്ടിന്

ഒരാളെ മാത്രം താമസിപ്പിച്ച

വീടുപോലെ

അത്

എപ്പോഴും ജീവനോടെ ഉണ്ട്

സ്ഥാനാർത്ഥി മരിച്ചു പോയതും

ഭരണം മാറിയതും

അനേകം വോട്ടുകൾ

ചെയ്തതും

അതിന് ഓർക്കാനിഷ്ടമല്ല

ആദ്യത്തെ വോട്ട്

വർഷങ്ങൾ കഴിയുമ്പോൾ,

കന്യകയായിരുന്ന സമയത്തെ

സ്വപ്നം കാണുന്ന സ്ത്രീയായിത്തീരും

ഓരോ തിരഞ്ഞെടുപ്പിനും

അവൾക്കൊപ്പമല്ലാതെ

ആർക്കും

ബൂത്തിലേക്ക് കയറിപ്പോകുക സാദ്ധ്യമല്ല.

-മുനീർ അഗ്രഗാമി