ചേർച്ച

 

ചേർച്ച

............

ഇപ്പോൾ ഒരു കവിത

ആകാശത്ത് നിൽക്കുന്നു

അതിന് വെളിച്ചമുണ്ട്

അതിന്റെ ചുറ്റുമുള്ളത്

അതറിയുന്നുണ്ട്

രണ്ടു വച്ചാലുകൾ പറന്നു

ഒടിഞ്ഞു വീണ

വാഴത്തോട്ടത്തിൽ കാറ്റ്

എന്തോ തിരയുന്നു

കവിത അതറിയുന്നുണ്ട്

ഇന്നലത്തെ കാറ്റിൽ

മോന്തായം പറന്നു പോയ വീട്ടിലെ കുട്ടി

ഈ കവിതയ്ക്ക് പേരിടുമ്പോൾ മാത്രം

അത് കവിതയാകും

അതുവരെ ആകാശം അതിനെ

സ്വന്തമെന്ന പോലെ താലോലിച്ച്

അവന്റെ കണ്ണിലൊഴിക്കും

അവന് അക്ഷരമറിയുമോ?

പാടാനറിയുമോ ?

എന്നൊന്നും ആകാശത്തിനറിയില്ല

കടൽത്തീരത്ത്

കടലിന്റെ ഇരമ്പൽ വന്നു നിന്ന്

അവനെ നോക്കി

തിരിച്ചുപോയി

ഇപ്പോൾ ആകാശത്ത്

ഒരു കവിത നിൽക്കുന്നു

മണ്ണിൽ അവനും.

അവരുടെ മിഴികൾ തമ്മിൽ

ചേർന്നിരിക്കുന്നു

ഇനി

സമയം അവരുടെ വിരലുകൾ തമ്മിൽ

ചേർക്കുമോ ?

-മുനീർ അഗ്രഗാമി