അഭിനയിക്കുന്ന കുട്ടികൾ - മുനീർ അഗ്രഗാമി

 അഭിനയിക്കുന്ന കുട്ടികൾ

അഭിനയിക്കുന്ന കുറേ കുട്ടികൾ

ഇല്ലാത്ത ഒരു ജീവിതം

ഉണ്ടെന്ന തോന്നൽ

പണിതുയർത്തുന്നു

അല്ല

അവർ

ഉണ്ടായിരുന്ന ഒരു ജീവിതം

ഇപ്പോഴില്ലെന്ന യാഥാർത്ഥ്യം

തകർത്തു കാണിക്കുന്നു.

നടക്കുന്ന ഒരാളെ പോലെ

കിടക്കുന്ന ഒരാളെ പോലെ

മരിക്കുന്ന ഒരാളെ പോലെ

അവർ പെരുമാറുന്നു

അവർ ഒരു കഥയിലാണ്

കളിക്കുന്നത്

അല്ല

കഥ അവരിലാണ്

ജീവിക്കുന്നത്

അവരൊന്നും ഇപ്പോൾ അവരല്ല

അവർ അവരിൽ നിന്നും ഖനനം ചെയ്തെടുത്തവ കൊണ്ട്

മറ്റൊരാളെ ഉണ്ടാക്കുന്നു

അഭിനയിക്കാനറിയാത്ത

ഒരു കുട്ടി അങ്ങോട്ടു നടന്നു വരുന്നു

അവന്റെ നടത്തവും

ഭാവവും അവർ സ്വന്തമാക്കുന്നു

അവൻ അവനെ കണ്ടു ഞെട്ടുന്നു

അവൻ തിരിച്ചു പോകുന്നു

അഭിനയിക്കുന്ന കുറെ കുട്ടികൾ

മറ്റാരോ ആയി ജീവിക്കുന്നു.

രക്ഷിതാക്കളുടെ ലോകം

അവസാനിച്ചു

- മുനീർ അഗ്രഗാമി