എഫ് ബി യിൽ എഴുതാറില്ല

 എഫ് ബി യിൽ എഴുതാറില്ല

.........................................

കുഞ്ഞമ്മയും

കുഞ്ഞേച്ചിയും

കുഞ്ഞെറുക്കനും

ഇപ്പോൾ എഫ് ബി യിൽ എഴുതാറില്ല

എഴുതിത്തീരുന്നതിനു മുമ്പേ

അവരുടെ വാക്കുകൾ

കളവുപോകുന്നു

സ്വർണ്ണം അലമാരയോടെ

അടിച്ചുമാറ്റുമ്പോലെ

അലമാര വീടോടെ

മോഷ്ടിക്കപ്പെടുമ്പോലെ

വീട് പറമ്പോടെ മോഷ്ടിക്കപ്പെടുമ്പോലെ

അവ കാണാതാവുന്നു

അന്നേരമാണ് വല്യേട്ടന്

കാലനില്ലാത്ത കാലം മോഷ്ടിച്ച്

കളളനില്ലാത്ത കാലമെഴുതാൻ തോന്നിയത്

അദ്ദേഹം ആടലോടകത്തെക്കുറിച്ചും

ആത്തേമ്മാരെക്കുറിച്ചും

ധാരാളം

എഴുതുന്ന വലിയ കവിയായതിനാൽ

കള്ളനില്ലാത്ത കാലം

മഹാകാവ്യമായി

അയ്യോ

കള്ളാ കളളാ എന്നു വിളിക്കാൻ മേലാ

കാക്കേ കാക്കേ എന്നതു മോഷ്ടിച്ചല്ലേ

നീയെന്നെ കള്ളാ കള്ളായെന്ന്

നീട്ടി വിളിച്ചതും

അവഹേളിച്ചതുമെന്നും കള്ളൻ

പൊതുകിണറ്റിൻ കരയിലിരുന്ന്

പൊതു ടാപ്പിൽ നൂണ്ടു കടന്ന്

ഞാൻ എല്ലാ വാക്കുകൾക്കും

പിന്നാലെ പോയി

താളങ്ങൾക്കും

വൃത്തങ്ങൾക്കും പിന്നാലെ പോയി

സി ഐ ഡിയായി

അവരിൽ പുതിയതൊന്നും

കണ്ടെത്തിയില്ല

- മുനീർ അഗ്രഗാമി