ഇനിയീഭാഷയിൽ അമ്മയില്ല
.......................................
എല്ലാ അമ്മയേയും
ആ അമ്മ കൊന്നുകളഞ്ഞു ;
തന്റെ പൈതലിനെ കൊന്നതിലൂടെ.
ദേശം എന്നോടു പറയുന്നു,
ഇനിയീഭാഷയിൽ അമ്മയില്ല
പേടിച്ചു ചിതറിയ കണ്ണുനീരല്ലാതെ
ഇനിയും വറ്റാത്ത മുലപ്പാൽ
കുഞ്ഞിനെ തിരഞ്ഞ് കിനിയുമ്പോൾ
നാമെന്തുത്തരം പറയും ?
ഭാഷ പഠിക്കും മുമ്പ്
കുഞ്ഞ് അമ്മേ എന്ന് വിളിക്കുന്നത്
ഞാൻ കേൾക്കുന്നു
മരിച്ച അമ്മമാർ
കുഞ്ഞിന്റെ പുഞ്ചിരിയെടുത്ത്
ജീവിക്കാൻ തുടങ്ങുന്നത്
ഞാൻ കാണുന്നു
എന്നിട്ടും
ആ അമ്മ
അതൊന്നും കേട്ടില്ലല്ലോ
കണ്ടില്ലല്ലോ.
അവളുടെ വിരലുകളിൽ
മലയാളത്തിന്റെ രക്തം !
- മുനീർ അഗ്രഗാമി
No comments:
Post a Comment