ആറു കുതിരകൾ

 ആറു കുതിരകൾ

.............................

ഒരേ പാറ്റേണിലുള്ള

ആറു കുതിരകൾ

തെരുവിലൂടെ ഓടിക്കൊണ്ടിരുന്നു

രാജാവിന്റെ രഥം

ആളുകൾ വളഞ്ഞിരുന്നു

കുതിരകളെ അഴിച്ചുവിടും മുമ്പ്

രാജാവിന്റെ വഴിയല്ലാതെ

സ്വന്തം വഴിയില്ലേ എന്ന്

കുതിരകളോട്

ജനങ്ങൾ ചോദിച്ചിരുന്നു.

രഥത്തിൽ രാജാവുണ്ടായിരുന്നില്ല

അദ്ദേഹത്തിന്റെ

പാദുകങ്ങൾ മാത്രമേ

ഉണ്ടായിരുന്നുള്ളൂ

അദ്ദേഹമുണ്ടെന്ന തോന്നൽ

പെട്ടെന്ന് പൊട്ടിച്ചിതറി

തെരുവു നിറയെ ജനം

തടിച്ചുകൂടുമ്പോൾ

കുതിരകൾ

പാറ്റേണുകൾ അഴിച്ചു വെച്ച്

ഒറ്റയൊറ്റയായി

ആറുദിക്കുകളിലേക്ക് സഞ്ചരിച്ചു.

ആറുദിക്കുകളിലും

രാജാവുണ്ടായിരുന്നില്ല

അവിടെ ഉണ്ടെന്ന തോന്നൽ

കുതിരകൾ ചവിട്ടിത്തകർത്തു.

പ്രജകൾ എങ്ങോട്ടു പോകുമെന്നറിയാതെ

നിലവിളിക്കുമ്പോൾ

വന്യമായ നിലവിളിയോടെ

കുതിരകൾ പ്രാചീനമായ കാടുകളിലേക്ക്

കുതിച്ചു പാഞ്ഞു.

അതിരുകൾ

അവ കണ്ടില്ല.

-മുനീർ അഗ്രഗാമി