പുതുവർഷം
.................................
ഒരു പൂ വിരിഞ്ഞു
മറ്റൊന്ന് കൊഴിഞ്ഞു
സത്യത്തിൽ മറ്റൊന്നും സംഭവിച്ചില്ല
നിശബ്ദതയുടെ ഭാഷയിൽ
ചെടികൾ കവിതയെഴുതി
ഓരോ വാക്കിനും
ഓരോ നിറങ്ങൾ
ഓരോ നിറത്തിനും
ഓരോ രൂപങ്ങൾ
ഓരോ രൂപത്തിലും
ഓരോ മണങ്ങൾ
കിളികളത്
ഉച്ചത്തിൽ വായിച്ചു
ഒരു വരിയുടെ അർത്ഥം തീരാതെ
വണ്ടുകൾ
കുട്ടികൾ
പൂമ്പാറ്റകൾ...
ഒരു പൂ വിടർന്നു
മറ്റൊരു പൂ കൊഴിഞ്ഞു
ഒരാൾ വീണതിനെ നോക്കിയിരുന്നു
അയാൾ കവിയായി
ഒരാൾ വിടരുന്നതിനെ നോക്കിയിരുന്നു
അയാൾ കാമുകനായി
ഒരാൾ
കൊഴിഞ്ഞതിന്റെയും
വിടർന്നതിന്റെയും നടുക്കിരുന്ന്
അസ്വസ്ഥനായി.
അയാൾ അപ്പോൾ ഭ്രാന്തനായി
ഒരു പൂ വിടർന്നു
ഒരു പൂ കൊഴിഞ്ഞു
മറ്റൊന്നുമില്ല
ഒരു വാക്ക്
ഉച്ചത്തിൽ വായിക്കുന്നുണ്ട്
ഒരു പെൺകുരുവി
വാക്കിൻറെ നിറം
മറ്റൊരു പൂവായി
മറ്റൊരു കവിതയായി
മറ്റൊരു വസന്തമായി
മൗനത്തിന്റെ തോട് പൊളിച്ച്
അത് വായിക്കുവിൻ.
-മുനീർ അഗ്രഗാമി
No comments:
Post a Comment