കെട്ടുപോകാത്ത ഒരാൾ

 കെട്ടുപോകാത്ത ഒരാൾ

..............................................

കത്തിക്കൊണ്ടിരിക്കുന്ന ഒരാൾ

ഒട്ടും പുകയാതെ

തെരുവിലൂടെ പോകുന്നു

യേശുവിന്റേയോ

ബുദ്ധന്റെയോ

കൃഷ്ണന്റേയോ

മുഖച്ഛായ

അയാളിൽ മൂന്നു പേർ കാണുന്നു

ഒരു കുട്ടി

അയാളുടെ പ്രകാശം മാത്രം

കാണുന്നു

എന്തിനാണ് അയാൾ കത്തുന്നതെന്ന്

മനസ്സിലാക്കാൻ

ഒരു ജലപീരങ്കി

ഒരു വിലങ്ങ്

ഒരു തോക്ക്

അവനു മുന്നിൽ പ്രത്യക്ഷപ്പെടുന്നു

അയാൾ കെട്ടുപോകില്ലെന്ന്

കുട്ടി ഉറപ്പിക്കുന്നു

കറണ്ടും ഇൻറർന്നെറ്റും

പെട്ടെന്ന് റദ്ദായി

ഉടനെ

അയാളിൽ നിന്നും കുട്ടി

ഇത്തിരി തീ കൊളുത്തി

ഒട്ടും പുകയാതെ.

- മുനീർ അഗ്രഗാമി