ഭാവന

 ഭാവന

.............

അനന്തത ഭാവനയുടെ

ചെറിയ തൂവലാണ്

കുന്നുകയറിച്ചെന്നപ്പോൾ

ഇന്നലെ

എനിക്കതു കിട്ടി

ആരിലൂടെ ചിറകടിച്ച്

പറന്നു പോയപ്പോഴാണ്

അതു വീണുപോയതെന്നറിയില്ല

അതിനു ചുറ്റും

മല കയറി വന്ന

കടൽ

ഒരാളുടെ കൈ പിടിച്ച്

നൃത്തം ചെയ്തിരുന്നു

മോഹമേറി

ഇറങ്ങി വന്ന നക്ഷത്രങ്ങൾ

മറ്റൊരാളുടെ കണ്ണിലിരുന്ന്

അയാളെ നോക്കുകയായിരുന്നു

കാറ്റിലാടും മരത്തണൽ

പ്രേമാർദ്രയായ് വിളിക്കെ

ഞാൻ ചെന്നപ്പോൾ

അവർ രണ്ടു പേരും എന്നിൽക്കയറി ഒളിച്ചു.

ഇടയ്ക്ക് ഒരാൾ പുറത്തു വന്ന്

കടലു കാണും

എന്നെ ചുംബിക്കും

ഇടയ്ക്ക് ഒരാൾ പുറത്തു വന്ന്

കൊടുമുടി കയറും

മഞ്ഞ് മുടിയിൽ ചൂടും

എന്നെ പുണരും

ഞാനാ തൂവൽ

ഇതാ ഇവിടെ

ഒട്ടിച്ചു വെക്കുന്നു

- മുനീർ അഗ്രഗാമി