വറ്റൽ

വറ്റൽ
............
എവിടുന്നോ പറന്നു വന്ന്
ഒരുത്തന്റെ
കഴുത്തിനു പിടിച്ചു പറയുകയാണ്‌
തുമ്പിയെന്നു പേരുള്ളവൾ ,

"ചെമ്പരത്തിപ്പൂവിൽ
വിശ്രമിച്ചിരുന്നോരെന്നെ
പിടിച്ച്
ഡാഫ്ഫോടിൽസിൽ
കൊണ്ടുവെച്ച്
അസ്വസ്ഥനാക്കിയവനെ
തിരഞ്ഞു നടക്കുന്നേൻ

അടിയാധാരമില്ലാത്ത
പുരയിടം പോലെ
ജീവിക്കുന്നേൻ

കല്ലെടുത്ത്‌ കല്ലെടുത്ത്
കളിയെല്ലാം മറന്നു പോയേൻ "

ഒന്നും മിണ്ടാതെ നിന്നില്ല ന്നേരം
തുമ്പയെന്നു പേരുള്ളവൻ.

അവൻ പറഞ്ഞു
"നിനക്ക് ജീവിക്കുവാൻ
ഒരിടമെങ്കിലുമുണ്ട്
എനിക്കോ
പുറമ്പോക്കു പോലുമില്ല
പുറത്ത് വീഴു മിന്റെർ ലോക്കുകട്ടകൾ
തടുക്കുവാൻ പൊലുമാവതില്ല

കൈയ്യെടുക്കൂ, കൈയ്യെടുക്കൂ
ഒന്നു വെളുത്തു ചിരിക്കുവാൻ
പൊലുമനുവാദമില്ല"

പിന്നെയൊന്നും പറഞ്ഞില്ലോമലാൾ
തുമ്പപ്പൂവിൽ വിശ്രമിക്കുവാനൊരുനാൾ വരുമെന്ന്
വെറുതെ നിനച്ച,വനെയോർത്തു
കണ്ണീരായ്
വറ്റിപ്പോയ്

Like