നക്ഷത്രങ്ങൾ മരിച്ച ആകാശം
.................................................
സ്കൂളിൽ പോകും മുമ്പ്
ഉടലാകെ നക്ഷത്രങ്ങളുള്ള
ആകാശമായിരുന്നു അവൻ

വീടതിൻ്റെ പ്രഭയിലായിരുന്നു
തിളങ്ങിയത്
വിട്ടുകാർ അതിൻ്റെ തിളക്കത്തിലായിരുന്നു
സന്തോഷം പകുത്തത്

സ്ക്കൂളിലേക്ക് പോകും വഴി ,
സ്കൂളിലിരിക്കും നേരം
അവൻ്റെ നക്ഷത്രങ്ങൾ
എങ്ങനെയാണ്
കെട്ടുപോയത് ?

നിങ്ങളെന്തിനാണ്
അങ്ങനെ ചെയ്തത്?
ഓരോ ദിവസവും
അവൻ്റെ പ്രഭ മങ്ങുന്നു
എന്നും അവനോടു മിണ്ടിയ പുല്ലുകളെ
അവൻ ഇപ്പോൾ കാണാറില്ല
കിളികളെ അവൻ കേൾക്കാറില്ല
മഴ മണം അവനടുത്തു വന്നു നിൽ ക്കുന്നത്
അവൻ അറിയാറില്ല

വിഷാദത്തിൻ്റെ കസേരയിലിരുന്ന്
അവൻ അസൈൻമെൻ്റ്
എഴുതുകയാണ്
തൊട്ടടുത്തു നിന്നു വിളിച്ച
അടയ്ക്കാക്കിളി യുടെ ശബ്ദം തിരിച്ചറിയാതെ
ഗൂഗിളിൽ നിന്ന്
അവനതിൻ്റെ ചിത്രമെടുക്കുന്നു

പുറത്തു കാത്തു നിൽക്കുന്ന കാറ്റിനെ
അകത്തു കയറ്റാതെ
അവൻ വിയർക്കാതിരിക്കാൻ
ഗവേഷണം നടത്തുന്നു

വീടിപ്പോൾ നക്ഷത്രങ്ങൾ മരിച്ചു പോയ
ആകാശത്തിൻ്റെ
ശവക്കോട്ടയാണ്

അവൻ്റെ മുഖത്ത് മാത്രം
ഒരു വെളിച്ചമുണ്ട്
സ്ക്രീനിൽ നിന്നും
കൈ നീട്ടിപ്പിടിച്ച്
അവനെ അത്
ഉമ്മ വെക്കുന്നു