കാഴ്ച ...........

അവർക്കപ്പുറം കടൽ
ചുവപ്പിൽ മഞ്ഞപ്പൂക്കളുള്ള
പരവതാനി വിരിച്ചു

അതൊന്നുമറിയാതെ
നിറമില്ലാത്ത വാക്കുകൾ
എറിഞ്ഞു ബലം പരീക്ഷിക്കുകയായിരുന്നു അവർ

കടല കൊറിച്ചു നടന്ന ഒരു കാലം
അവർക്കിടയിൽ കിടന്ന്
ശ്വാസം കിട്ടാതെ പിടഞ്ഞു

ധ്യാനത്തിലായിരുന്ന മണൽത്തരികൾ
ഞെട്ടിയുണർന്നു
അവരെ കേട്ടു തരിച്ചുപോയി

സൂര്യൻ്റെ അവസാന രശ്മിയിൽ
ചുണ്ടു ചേർത്തു
നിന്ന കിളികൾ
അസ്വസ്ഥരായി പറന്നു പോയി

ഒരു തണുത്ത കാറ്റ്
പരവതാനിയിലൂടെ ഒഴുകി വന്നു
നാലു മഴത്തുള്ളികൾ
ആകാശത്തിൻ്റെ
കവിളിലൂടെ ഇറങ്ങി വന്നു

മഴ
ഒരു കളിക്കുട്ടിയായ് വന്ന്
ഉടുപ്പ് തൊട്ടു നോക്കി
ചിനുങ്ങുമ്പോൾ
അവർക്കുള്ളിലെ
ഇരുട്ടെല്ലാം പുറത്തായി.
രാത്രിയായി

കടലും കരയും കൈ നീട്ടി നിൽക്കുകയാണ്
ഇരുട്ടാണ്
ഒന്നും വ്യക്തമല്ല

കാഴ്ചക്കാരൻ അവരെ വിട്ട്
തിരിച്ചു പോരുകയാണ്.