ചങ്ങലകൾ

സ്വന്തം കഴുത്തിലെ ചങ്ങല കണ്ടു പിടിക്കാൻ
നന്നേ പ്രയാസപ്പെട്ടു
എന്തൊരു ചങ്ങലയാണത് !
പല നിറങ്ങളിൽ
പലതരത്തിൽ കിലുങ്ങുന്നു
നോക്കുമ്പോൾ അതിന്
ഫാഷിസത്തിൻ്റെ നിറം
പല പല ടോണുകൾ
മതത്തിൻ്റെ കിലുക്കം
പല പല താളങ്ങൾ

പാർട്ടിയുടെ നിറം
ചില പ്പോൾ
അധികാരത്തിൻ്റെ താളം
ചിലപ്പോൾ

തൊലിയുടെ വെളുപ്പ്
കരിമരുന്നിൻ്റെ കറുപ്പ്
ടാങ്കറിൻ്റെ ശബ്ദം
ആളില്ലാ വിമാനത്തിൻ്റെ ഇരമ്പൽ

കയ്യിലും കാലിലും
ഒരു കനം
ചങ്ങലകൾ അവിടെയും ഉണ്ടാകണം
ഇനിയുള്ള നാളുകൾ
അത് കാണിച്ചു തരുമോ?

മുമ്പ്,
അടിയന്തിരാവസ്ഥയെ
അതിജീവിച്ചത്
നാവിലെ ചങ്ങല കണ്ടെത്തുന്നതിൽ
പരാജയപ്പെട്ടവർ

വിജയിച്ചവർ
അത് പൊട്ടിച്ചെറിയാൻ ശ്രമിക്കെ
പൊട്ടിപ്പോയവർ

അധികാരം മിക്കപ്പോഴും
ചങ്ങല നിർമ്മാണ ഫാക് ടറിയാണ്

ജനിക്കുന്ന കുഞ്ഞു പോലും
ചങ്ങലക്കണ്ണികളിൽ
കിടന്നാണു ചിരിക്കുന്നത്.