കൊണ്ടാട്ടങ്ങൾ

കൊണ്ടാട്ടങ്ങൾ
****************
കൊണ്ടാട്ടം
കൊണ്ടവരുടെ ആട്ടമാണ്
അതെപ്പോഴും തിളയ്ക്കുന്ന
എണ്ണയിലാണ്
സംഭവിക്കുക

കാരണം
മറ്റെല്ലാ തണുത്ത ഇടങ്ങളും
നിങ്ങളുടേതാകുമ്പോൾ
നിങ്ങൾ അവരെ എടുത്തെറിയുന്ന
ഏതെണ്ണയിലും അവരാടും
തീരും മുമ്പ്
മറ്റൊരു ജീവിതത്തിന്
തീരാ രുചിയാകണേ
എന്ന പ്രാർത്ഥനയിൽ.

നിങ്ങളുടെ രുചിക്കു വേണ്ടി
അവർ 'കൊണ്ട് ' ആടുന്നതാണ്
ഉണക്കനിറമുള്ള
പച്ചജീവിതം.
നിങ്ങളുടെ രുചി
അതെത്ര കൊണ്ടാടിയാലും
രസിച്ചാലും
അവർക്കവരുടെ ജീവിതം
രസമേയല്ല

വെയിലിൽ
ഭരണിയിൽ
ജയിലിൽ
തിളയ്ക്കലിൽ
പൊരിയലിൽ
വേദനയിൽ
അത് തീർന്നു പോകുന്നു