തണൽ

തണൽ
**********
അവളുടെ മനസ്സിൽ ഒരു മാവുണ്ട്
അതിന്റെ താഴെ കൊമ്പിൽ
ഒരൂഞ്ഞാലുണ്ട് 
അതിനടുത്താണ് ഞാൻ നില്ക്കുക

ആർക്കും മുറിക്കാൻ പറ്റാത്ത
ആ മാവിലാണ് ഞാനും അണ്ണാനും
ഒരേപോലെ കയറിപ്പോകുക

തിരിച്ചിറങ്ങുമ്പോൾ
അവളുടെ ചൊടിയിൽ മാമ്പഴം പഴുക്കും
ഊഞ്ഞാലിൽ മാമ്പഴക്കാലം വന്നിരിക്കും
അതിന്റെ താളത്തിൽ അവളാടും
ഞാനതിപ്പോൾ കാണാറില്ല

അടുക്കളയിലെ കലമ്പലിൽ
ഇടവേളകളുടെ ഇളവെയിലിൽ
മാവിൻ കൊമ്പിലെ കിളിക്കൂട്ടത്തിലൊരു
കിളിയായ് അവളിപ്പൊഴും ആടും

എത്ര മാവുകൾ മുറിച്ചാലും
എത്ര മാവുകൾ മുറിഞ്ഞു വീണാലും
എനിക്കതിന്റെ തണലുണ്ട് .

Like