നീ വലിച്ചെറിഞ്ഞ വാക്കുകളിൽ നിന്ന്

നീ വലിച്ചെറിഞ്ഞ വാക്കുകളിൽ നിന്ന്
എനിക്ക് പൊള്ളലേൽക്കുന്നു
കത്തിനിൽക്കുന്ന അതിൻ്റെ കനലിൽ
നിൻ്റെ ഹൃദയത്തിൻ്റെ ചുവപ്പ്.

ചുവപ്പിൽ പച്ചപ്പിൻ്റെ മോഹങ്ങൾ
മറന്നു തുടങ്ങിയ രക്തപ്രവാഹം.

എൻ്റെ നിശ്ശബ്ദതയിൽ
അതു തളം കെട്ടുന്നു
ഓരോ വാക്കും വീണു തകരും മുമ്പേ ഞാൻ
എടുക്കാൻ ശ്രമിക്കുന്നു
കയ്യിൽ നിറയെനിൻ്റെ കണ്ണീർത്തുള്ളിയുടെ
നനവു പടരുന്നു

ഏതോ ആത്മവേദനയിൽ
ഞാൻ പുളയുന്നു
അകലേയ്ക്കെന്നു പറഞ്ഞു
നീയെറിയുന്ന ഓരോ ശബ്ദവും
തൊട്ടടുത്തു നിന്ന് ഇപ്പോൾ
എന്നെയെടുക്കുന്നു
ഞാനത്രയ്ക്കും അവശനായിന്നുവല്ലോ

നിൻ്റെ വാക്കുകൾ പെറുക്കി 

പെറുക്കി 

നിൻ്റെ വാക്കുകളുടെ ഉടമയായിരുന്നല്ലോ

നീ വലിച്ചെറിഞ്ഞ വാക്കുകളിൽ നിന്ന്.