വാക്കനൽ

വാക്കനൽ
....................
കെട്ടുപോകുവതെങ്ങനെ
കൂട്ടുകാരാ
ചിട്ടയോടെ നാം ജ്വലിപ്പിച്ച കനലുകൾ
വാക്കിൽ സ്നേഹാഗ്നിയിൽ
വിടർന്നു പനിനീർപ്പുവായ്
ചോര തുടിക്കും ഹൃദയമായ്
നമ്മിലതു വിടരുമ്പോൾ

പട്ടു പോകുവതെങ്ങനെ
കൂട്ടുകാരാ നാം
വാക്കിലൊളിച്ച തെളിച്ചം കൊണ്ടു
പട്ടു പോൽ മൃദുലമാക്കിയ
ജീവിതത്തിൻ പരുപരുപ്പുകൾ?

കെട്ടുപോകുവതെങ്ങനെ
കൂട്ടുകാരാ
വാക്കിന്നാനന്ദ വാടിയിൽ
മൊട്ടിട്ടു നിൽക്കുമൊരഭൗമ ഗാനത്തിന്നിതളുകളായ്
നാം വിടരുവാൻ വെമ്പവേ

പൊട്ടിപ്പോകുവതെങ്ങനെ
കൂട്ടുകാരാ
ദേശാന്തരങ്ങളിൽ നിന്നു നാം
ചേർത്തു കോർക്കുന്ന
കനൽ വെളിച്ചമോലും
വാക്കിൻ മണിമുത്തുമാലകൾ

കൂട്ടുകാരാ
കെട്ട കാലത്തിൽ
കെട്ടിടപ്പെരുമയിയിൽ
കെട്ടവിളക്കുകൾ കത്തിക്കുവാൻ
വാക്കുകളല്ലാതെ
നമുക്കില്ലൊരു നെയ്ത്തിരി

അതിനാൽ
കെട്ടുപോകാതിരിക്കട്ടെ
നമ്മുടെ വാക്കനലും
വാക്കിൻ നിറഞ്ഞ സ്നേഹത്താൽ
നാം കെട്ടുമുറുക്കിയ
കൂട്ടും കുടുംബവും