രാത്രിയെ തിന്നുന്നവൻ

 രാത്രിയെ തിന്നുന്നവൻ

.....................................

രാത്രിയെ

ഡാർക്ക് ഫാന്റസി പോലെ

ചവച്ചു തിന്നുന്നു

മിന്നാമിനുങ്ങിനെ കാണുമ്പോൾ

കുട്ടിയാവുന്ന അസുഖം

വീണ്ടും തുടങ്ങി

കറുപ്പിന്റെ മധുരത്തിൽ

വിടരുന്ന ഒരു പൂവ്

ഒരു വസന്തമായിപ്പടരുന്നു

അതിന്റെ ഒരു പൂമ്പൊടി

പെട്ടെന്ന് പറവയായി

എന്റെ ചുണ്ടിലിരിക്കുന്നു

താമസമെന്തേ വരുവാൻ എന്ന പാട്ട്

പെയ്തുകൊണ്ടിരുന്നു

രാത്രിമുല്ല അതു കേൾക്കുന്നു

രുചിയുടെ തിരകളിൽ

സഞ്ചരിക്കുന്ന വള്ളത്തിലിരുന്ന്

ഞാൻ നാവിൽ ബാക്കിയുള്ളതു

അലിച്ചിറക്കി

തുഴയുന്നു

അവസാന തരിയും

ഇറങ്ങിക്കഴിഞ്ഞപ്പോൾ

വെളിച്ചം ചുണ്ടുകളിൽ

പടർന്നു

വെളിച്ചം കൊണ്ട്

വായ കഴുകി

കഴിഞ്ഞു പോയ കറുപ്പിന്റെ ഓർമ്മപ്പുറത്ത്

കയറി

അത് ചെവിയാട്ടി

എന്നെയുമെടുത്ത്

ഇനി

ഒരു പകൽ കടക്കും

-മുനീർ അഗ്രഗാമി