സമയത്തിന്റെ ആകൃതി

 സമയത്തിന്റെ ആകൃതി

കണ്ടിട്ടുണ്ടോ?

പാളത്തിൽ കൂകുന്ന വേഗത്തിൽ

അതിനെതിരഞ്ഞ്

ഒരാൾ പോയി

തിരിച്ചുവന്നില്ല അയാൾ

സ്കൂളിൽ നിന്നും വൈകി വന്ന കുട്ടി

കരഞ്ഞു തളരുന്ന കിടക്കയിൽ

അതിനെ കാണാൻ

ആരും വന്നില്ല

മഞ്ഞു പെയ്തു തീരാത്ത രാത്രിയുടെ

വെള്ളപ്പുതപ്പിൽ

പാളി വീണ വെളിച്ചത്തിന്റെ

മറ്റേ അറ്റത്ത്

ഇരുന്നിട്ടും അവളതു കണ്ടില്ല

സമയം അതിന്റെ തന്നെ

രക്തധമനികളിൽ തളരാതെ

ഒഴുകുന്ന ഒരു സന്ധ്യയിൽ

ഒരാൾ അതിനെ കണ്ടെത്തി

അയാളെ കാത്തിരിക്കുന്നയാളുടെ

കൃഷ്ണമണിയിൽ

അത് ഒളിച്ചിരിക്കുകയായിരുന്നു

- മുനീർ അഗ്രഗാമി