സ്നേഹം രാത്രിയുടെ പുളിമരക്കൊമ്പിലിരുന്നു കുലുക്കുന്നു

 സ്നേഹം

രാത്രിയുടെ

പുളിമരക്കൊമ്പിലിരുന്നു

കുലുക്കുന്നു

നക്ഷത്രങ്ങൾ വീഴുന്നു

അവയുടെ കണ്ണിൽ നിന്ന്

മുല്ലപ്പൂക്കളിറുത്ത്

കോർത്ത മാലകൾ

നീ മുടിയിൽ ചൂടുന്നു

ചുറ്റും നിന്റെ മുടിയിഴകൾ

ഞാൻ അതിന്റെ ഇളക്കത്തിന്റെ

ഒഴുക്കിൽ

നീന്തുന്ന ഒരു മീൻ

എന്റെ ചലനങ്ങൾ കോർത്ത്

ഞാൻ നിന്റെ കഴുത്തിൽ

ഒരു മാല ചാർത്തുന്നു

ഒരു ചുംബനം

അതിന്റെ ലോക്കറ്റ്

ഇരുട്ടിൽ

അതു വീണു പോവാതിരിക്കാൻ

നീ ചിരിച്ച്

വെളിച്ചമാവുന്നു .

- മുനീർ അഗ്രഗാമി