കൈ പിടിച്ചവർ

 കൈ പിടിച്ചവർ 

.............................................

നടന്നു തുടങ്ങുമ്പോൾ

കൈ പിടിച്ചവർ

മരിച്ചു പോയി.

വീണു കിടക്കുമ്പോൾ

അവരുടെ

ഓർമ്മയുടെ വിരൽ പിടിച്ച്

എഴുന്നേറ്റു

ഉള്ളിലെവിടെയോ

അവർ പിടിച്ചിട്ടുണ്ട്

സത്യമായും

അതിലൊരാൾ

എന്റെ രക്തത്തിന്റെ തോളിൽ

കൈയ്യിട്ടു നിൽക്കുന്നു

മറ്റൊരാൾ

കൈയിലെ ഞരമ്പ് പിടിച്ച്

അങ്ങനെ നിൽക്കുന്നു

പ്രാവുകൾ കുറുകി

ഒരു കാക്ക പറന്നു പോയി

പരുന്തുകൾ വട്ടമിട്ടു

പതിനാലാം നിലയുടെ ടെറസ്സിൽ

ഒരു ഹെലിക്കോപ്റ്റർ വന്നു നിന്നു

എനിക്കിപ്പോൾ അതൊക്കെ കാണാം

ഒരാൾ എന്റെ കൺപീലികൾ

തുറന്നു പിടിച്ചിരിക്കുന്നു

നിലത്ത് യാത്രകൾ ഉപേക്ഷിച്ച

തൂവലുകൾ.

അത്ര എളുപ്പം

വീണുപോവില്ല

മരിച്ചവർക്കൊപ്പം

ജീവിക്കുമ്പോൾ .

- മുനീർ അഗ്രഗാമി