ഹൃദയത്തിലെ എഴുത്ത്

ഹൃദയത്തിലെ എഴുത്ത്
.......................................

ഹൃദയം ഹൃദയത്തിലേ എഴുതൂ
എല്ലാ ഭാഷകൾക്കും
മുമ്പുള്ള ഒരു ഭാഷയിൽ

ആന എന്നെഴുതിയാൽ
ചിന്നം വിളിച്ച് മേയുവാൻ
ചുറ്റും കാടു വളരുന്ന ഭാഷയിൽ

മഴ എന്നെഴുതിയാൽ
തുള്ളിക്കൊരു കുടം പെയ്തുനിറയാൻ
കുളം കുത്തുന്ന ഭാഷയിൽ

മണ്ണെന്നെഴുതിയാൽ
വിത്തുകളെല്ലാം
കണ്ണുതുറക്കുന്ന ഭാഷയിൽ

കുട്ടി എന്നെഴുതിയാൽ
ഓടിയെത്തുന്നകുസൃതികൾ
നിറഞ്ഞാടുന്ന ഭാഷയിൽ

എഴുതുക ഹൃദയത്തിൽ
വാക്കിനുചുറ്റും നൃത്തം വെയ്ക്കും
വാക്കുകൾ വായിക്കുവാൻ

.............................................മുനീർ അഗ്രഗാമി