പുലരിക്കുഞ്ഞ്

പുലരിക്കുഞ്ഞ്
...........................
രാവു പെറ്റെന്നു കേട്ടു ,
കുഞ്ഞിനെ കാണാൻ
ഉറക്കമുണർന്നെത്തിയപ്പോൾ
പുൽക്കൊടിത്തുമ്പിലൊരു
പുഞ്ചിരി ബാക്കി വെച്ചാ
പുലരിക്കുഞ്ഞെങ്ങോ പോയ്!

വെളിച്ചത്തിൻ പിന്നിലെങ്ങോ
ഒളിച്ചിരിക്കുന്നുണ്ടാവണം
പകൽ തിരഞ്ഞു നടന്നു തളരെ,
സന്ധ്യ കുടിച്ചു തളർച്ച മാറ്റി
കടൽക്കാറ്റിൽ തെല്ലുനേരമിരുന്നു പോയ്!

നെറ്റി തടവുവാൻ വന്ന രാവിനൊപ്പം
ഇരുളിൽ ചെന്നു നോക്കുമ്പോൾ
കുസൃതി കാട്ടിയിരുളിൻ പിന്നിലൂടെ
ഓടിക്കളിച്ചും കളിപ്പിച്ചും
പരുങ്ങിയിരിപ്പായെങ്ങോ !

പിന്നെ ത്തളർന്നുറങ്ങി
ഞെട്ടിയെണീക്കെ ,
രാവിലെയുടെ ചുവന്ന പൊത്തിലൂടിറങ്ങി വന്നു
കൈ പിടിച്ചു ചിരിക്കയായ്
പിച്ചവെച്ചെത്തിയ
പുലരിപ്പൈതൽ !

                                               മുനീർ  അഗ്രഗാമി