ആരും പാട്ടിലായില്ല

അവർ
നാലഞ്ചു പേരുണ്ടായിരുന്നു
പാടാൻ പറഞ്ഞു
പാടുപെട്ടു

സംഗീതത്തെക്കുറിച്ച്
അധികമൊന്നും അറിയില്ല
നല്ല സംഗീതം കേൾക്കാൻ ഇഷ്ടമാണ്.
പുഴയുടെ ,
കിളിയുടെ,
മഴയുടെ ,
നല്ല ശബ്ദമുള്ള മനുഷ്യരുടെ.
വീണ്ടും പാടാൻ പറഞ്ഞു
പാടിയില്ല
പാടൂ പാട്ടിലാകാം
പാടിയില്ല
ആരും പാട്ടിലായില്ല
അങ്ങനെ
കിളിപ്പാട്ടുകേൾക്കാതെ
കളിപ്പാട്ടുകേൾക്കാതെ
കളകളപ്പാട്ടുകേൾക്കാതെ
പാടുന്നവരുടെ നഗരത്തിൽ
ആസ്വാദകനായി ജീവിക്കുന്നു.
പാടില്ല
പാടില്ല
എന്നുള്ളിലിരുന്ന്
ഒരു പഴങ്കിളി നിരന്തരം ജപിക്കുന്നുണ്ടോ
എന്നൊരു തോന്നൽ !
- മുനീർ അഗ്രഗാമി