ഒരൊറ്റ ക്കണ്ണാണ് അതിർത്തി

സഖാവേ
അങ്ങോട്ടും ഇങ്ങോട്ടും
ഒരേ സമയം നോക്കി നിൽക്കുന്ന
ഒരൊറ്റ ക്കണ്ണാണ്
അതിർത്തി .

അങ്ങൊരു രാജ്യം
ഇങ്ങ് മറ്റൊന്ന്
അവിടെ നീ
ഇവിടെ ഞാൻ
രക്തത്തിൽ ഒരു കൊടി .

രണ്ടു സമുദ്രങ്ങൾ ക്കിടയിലെ
അതിർത്തി പോലെ
നമുക്കിടയ്ക്ക് ഒരു വെളിച്ചം
നമ്മെ നോക്കുന്ന ഒറ്റക്കണ്ണ്
നിനക്കു മെനിക്കും
പ്രതിബിംബിക്കാനുള്ള കൃഷ്ണമണി .

നാം ഒന്നായിട്ടും രണ്ടായ പോലെ
രണ്ടായിട്ടും ഒന്നായ പോലെ
ജലപ്രവാഹങ്ങളതിന്നു സാക്ഷികൾ
കടൽത്തിരകളും
മഴത്തുള്ളികളുമതിനുസാക്ഷികൾ.

നാം കണ്ണിൽ നോക്കുമ്പോൾ
അതിർത്തിയിൽ
അതിൻ്റെ കൺപീലിയിൽ
കണ്ണീർ ത്തുള്ളികൾ
അതു തുടയ്ക്ക്,
തുടയ്ക്ക് !

സഖാവേ
നമുക്കതിനെയൊരു
വെള്ളരിപ്പ്രാവാക്കണം
വെളുത്ത ഒരു ചിറക് നീ
ഒരു ചിറക് ഞാൻ
രക്തത്തിൽ നിന്ന് കൊടിയെടുത്ത്
ആ ചിറകിൽ
ഉയർത്തിക്കെട്ടണം .
ഒറ്റക്കണ്ണും നനയാതെ ,
നനയാതെ .

( ഉത്തര-ദക്ഷിണ കൊറിയകളെ ഓർത്തു വീണ്ടും വായിക്കുക )

-മുനീർ അഗ്രഗാമി