ചോദ്യം

ചോദ്യം
.. ...........
എന്നിലൊരു പൂമൊട്ടുണ്ട്
അതിനുള്ളിൽ സമാധാനമുണ്ട്
അതെന്നാണ് വിടരുക ?
കുട്ടി ചോദിച്ചു
സ്വന്തമായി മണ്ണ് ഉണ്ടാകുമ്പോളെന്ന്
കടൽ ഉത്തരം പറഞ്ഞില്ല
കടലിൻ്റെ ചെവിയിൽ അവൻ മുഖം ചേർത്തു
രോദനം പോലെ അവൻ്റെ ജീവൻ
ചെവിയിലൂടെ കടലിനടിയിലേക്ക് പോയി
ഏതോ തിരയിൽ ലയിച്ച്
തലതല്ലിക്കരഞ്ഞു
തീരത്ത് അസ്വസ്ഥതയുടെ ആൺ കുട്ടിയായ്
അവൻ അനക്കമില്ലാതെ കിടന്നു
ഉത്തരം കയ്യിലുള്ളവർ
അവനെ നോക്കി നിന്നു
അവർക്ക് അവൻ്റെ ചോദ്യം
മനസ്സിലായതേയില്ല.

- മുനീർ അഗ്രഗാമി