മൂന്നു തുള്ളികൾ
...........................
മരുമണൽത്തരിയായ്
പൊള്ളിയുറങ്ങിയ
മനസ്സിലേക്ക്
സ്വപ്നത്തിൻ്റെ ഒരു തുള്ളി ഇറ്റി വീണു

അടിച്ചുവാരിയും
അലക്കിയും
അടുക്കി പെറുക്കിയും
പൊടിപിടിച്ചു കിടന്ന
നിമിഷങ്ങൾ നനഞ്ഞു
കഴുകിത്തുടയ് ക്കുവാനാകാതെ അവ കുതിർന്നു, വറ്റി
ഒരു തുള്ളി കൂടി ഇറ്റി വീണു
ഉറക്കിൻ്റെ സുഖമറിഞ്ഞ്
മറ്റു മൂന്നു പേർ
കുളിരെടുത്തു പുതയ്ക്കുന്നു
പാതിരയുടെ നെഞ്ചത്തിരുന്ന്
ദോശയ്ക്കരയ്ക്കുന്ന ശബ്ദം
അവരെയുണർത്തുമോ
എന്ന പേടിയിൽ
തീക്കാറ്റടിക്കുന്നു
ആ തുള്ളിയും വറ്റി
ഒരു തുള്ളി കൂടി
കഴുകാൻ ബാക്കിയുള്ള പാത്രത്തിൽ വീണു
പറന്നു പറന്ന്
അതിരില്ലാതെ പറന്ന്
ലോകം ചുറ്റുന്ന ഒരു സ്വപ്നത്തിൻ്റെ
തുള്ളി.
തലേന്നാളത്തെ കറിയുടെ എരിവിനൊപ്പം പൈപ്പുവെള്ളത്തിൽ
അതൊലിച്ചുപോയി
അഴുക്കുചാലിൽ
അതിനി കൊതുകുകളായ് ജനിക്കും
വെറുതെ ഉറങ്ങുന്നവരുടെ
ഉറക്കം കെടുത്തും.
- മുനീർ അഗ്രഗാമി