ഒരു പെൺകുട്ടി മഴ പ്രതീക്ഷിച്ച് ഇരിക്കുന്നു

ഒരു പെൺകുട്ടി
മഴ പ്രതീക്ഷിച്ച് ഇരിക്കുന്നു
പകൽച്ചൂടിൻ്റെ
കനത്ത പീഡനങ്ങളിൽ പേടിച്ച്
രാത്രിയിരുട്ടിൻ്റെ
കനത്ത നിഗൂഢതയിൽ
ഓർമ്മയിലേക്ക് നടന്നു പോയ
ഒരു തണുത്ത കാറ്റിൻ്റെ
വിരൽ പിടിച്ച്

പൊള്ളി വറ്റിയ ഒരു നദി
മേഘങ്ങളിലെവിടെയോ
ഒളിച്ചിരിക്കുന്നുണ്ട്
അത് തിരിച്ചു വരുമെന്നാകുമോ
അവൾ പ്രതീക്ഷിക്കുന്നത് ?
ഇത്ര പൊള്ളിയിട്ടും
താനെന്താണ് വറ്റിപ്പോകാത്തതെന്നാകുമോ
അവൾ ആലോചിക്കുന്നത്?
പുറത്തും അകത്തും
ഒരുപോലെ പെയ്യുന്ന മഴകളേ
അവളെ അനുഗ്രഹിക്കുക!
- മുനീർ അഗ്രഗാമി