കണ്ടലാവുക അത്ര എളുപ്പമല്ല

 

 

കണ്ടലാവുക അത്ര എളുപ്പമല്ല

 

...............................................................

 

 മനുഷ്യനായതിൽ മനംനൊന്തു നീ

കണ്ടലാകുവാൻ പോയോ കൂട്ടുകാരാ ?

പക്ഷേ

കണ്ടലാവുക അത്ര എളുപ്പമല്ല

അതിന്

കാലുകൾ ഭൂമിയിലുണ്ടാവണം;

ഭൂമിയുണ്ടാവണം

ഭൂമിയിൽ പുഴകളുണ്ടാവണം

പുഴയിൽ വേരുകളുണ്ടാവണം

വേരുകൾ ആഴമറിയണം;

വേരുകളുടെ ആഴമറിയണം

നിസ്വാർത്ഥനായി

പൊക്കുടനെ പോലെ

ചെളിയിലിറങ്ങണം

നെല്ലു കളോട് കഥ പറയണം

ഞാറുകളോട് കൂട്ടുകൂടണം

പടിഞ്ഞാറൻകാറ്റിനെ തടുക്കാൻ

കണ്ടൽച്ചെടികൾ

മനസ്സിൽ നട്ടുവളർത്തണം

കൂട്ടുകാരാ

കണ്ടലാവുക അത്ര എളുപ്പുല്ല

വേരുകളില്ലാതെ

മലവെള്ളപ്പാച്ചിലിൽ

ഞാനും നീയും പൊങ്ങുതടികളായ്

നീന്തുമ്പോൾ.

( ജീവേഷിനു് )

 

-മുനീർ അഗ്രഗാമി