അസാധുവാക്കിയ നോട്ടുകൾ ഇപ്പോൾ എന്തു ചെയ്യുകയായിരിക്കും ?

അസാധുവാക്കിയ നോട്ടുകൾ
ഇപ്പോൾ എന്തു ചെയ്യുകയായിരിക്കും ?

പുറത്തിറങ്ങാനാവാതെ
തീർത്തും
നിയമവിധേയമായ തടവറകളിൽ
അവ വീർപ്പുമുട്ടിയിരിക്കുകയാകുമോ ?

തടവറ ചാടി പുറത്തെത്തിയാൽ
പത്രങ്ങളിൽ വായിച്ചപോലെ
തടവുപുള്ളികളോടെന്ന പോലെ
അവയെ വെടിവെച്ചു കൊല്ലുമോ ?
സാധുക്കളെയെന്ന പോലെ
ചുട്ടെരിക്കുമോ ?

സാധുവിനോട്
സാധുവായ
കുട്ടി ചോദിച്ചു .

ആരാണ് അവയെ
അസാധുവാക്കിയത് ?

സാധു ഉത്തരം പറഞ്ഞു
കുട്ടി ഉത്തരം അസാധുവാക്കി,
കുടിലിൽ ചെന്ന്
പട്ടിണി കിടന്നു .

അന്നേരം വിശപ്പ് അവളോട്
മെല്ലെ ചോദിച്ചു , കുഞ്ഞേ
എത്ര എളുപ്പത്തിലാണ്
നീ അസാധുവായത്?
തികച്ചും മൂല്യ രഹിതമായത്?

നിന്നെ പോലെ
മൂല്യമില്ലാതാക്കപ്പെട്ട
മനുഷ്യരി പ്പോൾ
എന്തു ചെയ്യുകയായിരിക്കും ?

- മുനീർ അഗ്രഗാമി