രാജാവ് നഗ്നനാണെന്നു തന്നെയാണ്...

രാജാവ് നഗ്നനാണെന്നു തന്നെയാണ്...

///////////////////////////////////////////////////////
രാജാവ് നഗ്നനാണെന്നു തന്നെയാണ്
അവനിപ്പോഴും പറയുന്നത്

എടിഎം ക്യൂവിലോ
ബാങ്കിലെ വരിയിലോ
ബീവറേജിനു മുന്നിലും
സിനിമാശാലയിലും നോക്കി
സർ
അവിടെയൊന്നും അവനില്ല

ഇന്നിതിലെ കടന്നു പോയ
ശിശുദിന റാലിയിൽ
ചാച്ചാജിയുടെ വേഷം കെട്ടിയത്
അവനാണ്.

സ്കൂളിലെത്തിയാൽ
അവനിൽ നിന്നവരത്
അഴിച്ചെടുക്കും

സിലബസ്സ്
പഠിച്ചു തീരുംമുമ്പവിടെ ചെന്നാൽ
അവനെ തിരിച്ചറിയാം,

ഒരൊറ്റ രാത്രി കൊണ്ട്
അസാധുവായിപ്പോയ
വസ്ത്രം
അവൻ കാണില്ല

അറിവ്
പേടി പുറത്തു നിർത്തിയ
കുട്ടിയാണ്

സർ
അവനെ കിട്ടിയില്ല

അവൻ സ്വന്തം വാക്കുകളുടെ കുതിരപ്പുറത്ത്
പാഞ്ഞു പോയി

കാഴ്ചയും
ഉൾക്കാഴ്ച്ചയുമാണ്
അവൻ്റെ കുതിരയുടെ
കണ്ണുകൾ '

- മുനീർ അഗ്രഗാമി