മാതാവ്

മാതാവ്
..............
റബ്ബർ മരങ്ങൾ ക്കിടയിലൂടെ
വണ്ടിയോടിച്ച് ക്രിസ്മസ് പോയി.

മഞ്ഞു തുള്ളികളുടെ
കരോളിനൊപ്പം
പപ്പയും പോയി

ഇല ത്തുമ്പുകളിൽ
കണ്ണീരു കുടഞ്ഞിട്ട്
ഡിസംബർ ജനുവരിയിലേക്ക് നടന്നു.

കൊഴിഞ്ഞ ഇലകളിളക്കി നോക്കി
അസ്വസ്ഥയായ
ഇളം കാറ്റായി അമ്മച്ചി
അകത്തുനിന്ന് വരാന്തയിലേക്കും
വരാന്തയിൽ നിന്ന കത്തേക്കും വീശുന്നു

നക്ഷത്രങ്ങൾ കെട്ടുപോയ വീട്ടിൽ
അവരൊറ്റയ്ക്കായിരുന്നു
മറിയമെന്നായിരുന്നു
അവരുടെ പേര് .

.......................................................മുനീർ അഗ്രഗാമി