യേശുവും ഞാനും

യേശുവും ഞാനും
................................
നിന്നെ ഒരിക്കൽ കുരിശിലേറ്റുകയും
നീ ഒരിക്കൽ ഉയിർക്കുകയും മാത്രമേ ചെയ്തുള്ളൂ

എന്നെ ഓരോ ദിവസവും
കുരിശിലേറ്റുകയും
ഞാൻ ഉയിർക്കുകയും
ചെയ്യുന്നു

ഒരു വ്യത്യാസ മേയുള്ളൂ
നിൻ്റെ പീഡകൾ
എല്ലാവരും കണ്ടിരുന്നു
പക്ഷേ
എൻ്റെ പീഡകൾ
അദൃശ്യമാണ്

നിന്നെ കുരിശിലേറ്റിയവർ തന്നെ എല്ലാറ്റിൻ്റേയും പിന്നിൽ
അവരുടെ ഭാഷയും
വേഷവും മാറി എന്നേയുള്ളൂ

നീ പുൽക്കൂട്ടിലും
ഞാൻ പാടത്തുമാണ്
ഭൂജാതനായത്

അതു കൊണ്ട് നിൻ്റെ ജന്മദിനം
ആഘോഷിക്കാൻ
മഞ്ഞിലൂടെ സന്താക്ലോസ് വരുന്നു

എൻ്റെ ജൻമദിനത്തിൽ
ചുട്ടുപൊള്ളുന്ന വെയിലിലൂടെ
ഗുൽമോഹറുകൾ വരുന്നു

എൻ്റെ മുറിവുകളിൽ നിന്ന്
അവ ചുവപ്പുടുപ്പ് തുന്നുന്നു

നിൻ്റെ ജന്മദിനത്തിൽ
കുരിശിൽ കിടന്ന്
നിൻ്റെ ജന്മനക്ഷത്രം കാണുമ്പോൾ
എനിക്ക്
പുഞ്ചിരി വരുന്നു

......................................മുനീർ അഗ്രഗാമി