ഒരുമ്മ കൊണ്ട്

ഒരുമ്മ കൊണ്ട്
..............................
എല്ലാ വ്യഥകളും
അട്ടിയട്ടിയായി വെച്ച്
അതിനു മുകളിലിരിക്കുന്നു
ഒരാൾ.

പുഞ്ചിരി മാത്രമയാൾക്ക് കൂട്ട്
ഒരു കരച്ചിൽ
അയാളെ പിടിക്കാൻ വരുന്നു
ഒരുമ്മ കൊണ്ട്
അയാളതിനെ നേരിടും
അയാളാകുവാൻ ശ്രമിച്ച്
വ്യഥകൾ അടുക്കാനാവാതെ
പണിതീരാത്ത വീടുപോലെ
ഒരിടത്തിൽ
ഞാൻ കാടുപിടിച്ചു നിൽക്കുന്നു
എങ്ങനെയായിരിക്കും
അയാളതിനു മുകളിൽ കയറിയിട്ടുണ്ടാവുക ?
വ്യഥകൾ അട്ടിവെയ്ക്കാതെ
അതിൻ മുകളിൽ ചവിട്ടിക്കയറാതെ
അയാളിലേക്ക്
മറ്റുവഴികളില്ല
അയാളിപ്പോൾ
എന്നെ നോക്കി പുഞ്ചിരിക്കുന്നു
നടത്തം പഠിക്കുന്ന
കുഞ്ഞിനെ നോക്കുമ്പോലെ .
-മുനീർ അഗ്രഗാമി