മുകളിൽ

മുകളിൽ
..........................
ഉയർന്നുയർന്ന്,
കയറി വരില്ലെന്നു കരുതി
നാമുണ്ടാക്കിയ പാലത്തിനും
തൂക്കുപാലത്തിനും മുകളിൽ പുഴ.
നമ്മുടെ സന്ദർശനംപോലും
അത് റദ്ദ് ചെയ്തിരിക്കുന്നു

പുഴ ദളിതനാണ്
ആദിമനിവാസി
കാലങ്ങളായി ആഴത്തിൽ മുറിവേറ്റവൻ
പുതിയ ജലപ്രവാഹമായി
അവൻ വന്നിരിക്കുന്നു
നാമവനെ താഴോട്ടു നോക്കി നിന്ന
എല്ലായിടത്തും അവനാണ്
ജലം അവന്റെ മുദ്രാവാക്യം
നാമുണ്ടാക്കിയ ഒരളവുകൊണ്ടും
അളന്നു തീരാതെ
അവൻ ഒഴുകുന്നു
അവൻ അവനാകുന്നത്
ആർക്ക് സഹിക്കാൻ പറ്റും ?
കുറച്ചു നേരത്തേക്കായാലും
അവനൊഴുക്കിക്കളഞ്ഞു ,
നമ്മുടെ അഹന്ത!
- മുനീർ അഗ്രഗാമി