പ്രണയഗണിതം

പ്രണയഗണിതം
............................
ഞാനും നീയും
പുഴയുടെ രണ്ടു കരകൾ

പുഴ = ചുംബനം.
പുഴ നിറഞ്ഞിരിക്കുന്നു,
നാം ആഗ്രഹിച്ച മഴ കൊണ്ട് .
* * *
ഞാൻ എന്ന വാക്കിനെ
നീ എന്ന വാക്കു കൊണ്ട്
ഗുണിക്കുന്നു
നാം എത്തിച്ചേർന്ന ഉത്തരത്തിൽ
കടലിരമ്പുന്നു
സന്ധ്യ കടലിനെ
വെളിച്ചം കൊണ്ടു ഗുണിക്കുന്നു
നാമതു കണ്ട് മതി മറന്ന്
ഇരുന്നു പോയി.
രാത്രിയായി.
രണ്ടു നക്ഷത്രങ്ങളായി .
* * *
ഇപ്പോൾ കിട്ടിയ സമയത്തിൽ നിന്ന്
പഴയ കാലത്തെ
മൂന്നു വട്ടം കുറയ്ക്കണം
നിനക്ക്
എന്നിലെത്താൻ
വയലിൽ നിന്ന്
ഫ്ലാറ്റിനേയും മൈതാനത്തെയും
കുറയ്ക്കാൻ ശ്രമിച്ചു
ആരും സമ്മതിച്ചില്ല
അതിനാൽ മറ്റൊരു കാലം
ഞാൻ
വയലിൽ ഒരു നെൽച്ചെടിയായും
നീ ഫ്ലാറ്റിലെ ഷോകേസിൽ
ഒരലങ്കാര വസ്തുവായും പുനർജനിച്ചു .
* * * *
ആകെയുള്ള ഉണർവ്വിനെ
ഉറക്കം കൊണ്ട് ഹരിച്ച്
ഞാനെടുത്തു വെച്ചു
നീ വരുമ്പോൾ കാണിക്കാൻ
മറ്റൊരു നേരം ഉണ്ടായിരുന്നില്ല
കണ്ടപ്പോൾ
നീ പനിനീർപ്പൂപോലെ
ശരിക്കും വിടർന്നു ചുമന്നു
ഭൂലോകത്ത് ഇന്നോളമില്ലാത്ത
ശരിയായി.
- മുനീർ അഗ്രഗാമി