ഒരരുവിയെ എനിക്കറിയാം

കാട്ടിൽ നിന്നും തുടങ്ങി
പുഴയിലവസാനിക്കുന്ന
ഒരരുവിയെ എനിക്കറിയാം
പുഴയിൽ നിന്നും
കടലിൽ നിന്നും
അതെന്നോടു സംസാരിക്കുന്നു

പരിചയമില്ലാത്തതിനാൽ
അത് നിങ്ങളോട് സംസാരിക്കുന്നില്ല എന്നേയുള്ളു
പുഴയിൽ നിന്നും
കടലിൽ നിന്നും.
അതുകൊണ്ട് ,
നിങ്ങൾ അതിനെ അറിയാത്തതുകൊണ്ട്
അതവിടെ ഇല്ല എന്നു മാത്രം പറയരുതേ
മരിച്ചവർ മിണ്ടുമ്പോലെ
ജീവിച്ചിരിക്കുന്നവർ
മിണ്ടുമ്പോലെ
അതെന്നോടു മിണ്ടുന്നു.
ആ അരുവിയെന്നോട്
ഇന്നതിന്റെ വീടിനെ കുറിച്ചു ചോദിച്ചു
അതിന്റെ വീടോ
വീടിന്റെ വീടായ മലയോ
ഇന്നവിടെയില്ലെന്ന് ഞാനെങ്ങനെ
അതിനോടു പറയും ?
പറയൂ
എങ്ങനെ പറയും !
- മുനീർ അഗ്രഗാമി