താളം
........
വയലിലെല്ലാം
വലിയ വികസനം വന്നപ്പോഴേ
ചെളിയിൽ വിളഞ്ഞ താളം പോയി
പുഴയിലെല്ലാം
വെയിലിൻ്റെ യുളളം തെളിഞ്ഞപ്പോഴേ
ഒഴുക്കിൻ്റെ താളം പോയി
വസന്തത്തിലെല്ലാം
വിഷം നിറഞ്ഞപ്പോഴേ
മണത്തിൻ്റെ താളം പോയി
പൂത്തു നിന്ന മരമെല്ലാം
കടലു കടന്നപ്പോഴേ
കാടിൻ്റെ താളം പോയി
മഴയെല്ലാം
കരഞ്ഞു കലങ്ങിയപ്പോഴേ
പെയ്ത്തിൻ്റെ താളം പോയി
കിളികളെല്ലാം
ഓർമ്മയിൽ നിന്നും
പറന്നകന്നപ്പോഴേ
ചിറകിൻ്റെ താളം പോയി
ചുറ്റുമാരോ വരച്ച വൃത്തത്തിൽ
നിന്നു തിരിയവേ
എൻ്റെ താളവും പോയി.
-മുനീർ അഗ്രഗാമി
No comments:
Post a Comment