അഞ്ചു പുലരികൾ

അഞ്ചു പുലരികൾ
........... ...... ...:..!.:
കൊഴിഞ്ഞു വീണ രാത്രിയെ
കരിയിലയെന്ന പോലെ
അടിച്ചുവാരിക്കളയുന്നു
പുലരിപ്പുതു നാരി.
***
രാത്രിക്കരി
കഴുകി വെളുപ്പിച്ച്
വെളളിപ്പാത്രം
മുറ്റത്ത് കമിഴ്ത്തുന്നു
പുലരിയമ്മ
***
ഉറക്കിൻ ചിത്രം പതിഞ്ഞ
പൊതിയഴിച്ച്
രാത്രിച്ചോക്ളേറ്റ് രുചിച്ച്
വെളുക്കെ ചിരിക്കുന്നു
പുലരിക്കുട്ടി
***
നീണ്ട താടിയിലെ
രാത്രിക്കറുപ്പു രോമങ്ങൾ
നരച്ചു തുടങ്ങവേ
തടവി മുഴുവനും വെളുപ്പിക്കുന്നു
പുലരിയപ്പൂപ്പൻ
***
രാത്രിക്കട്ടൻ കുടിച്ചു തീർത്ത്
തൂവെള്ള ഖദറണിഞ്ഞ്
അങ്ങാടിയിലേക്കു നടന്നു പോകുന്നു
പുലരിയച്ഛൻ.

--മുനീർ അഗ്രഗാമി