ഞാൻ സസ്യഭുക്കാണ്

ഞാൻ സസ്യഭുക്കാണ്
......................................
എനിക്കിപ്പോൾ സങ്കടങ്ങളില്ല
എന്തിനെൻ്റെ കഴുത്തറുത്തെന്ന്
ചെഞ്ചീരകൾ ചോദിച്ചില്ലല്ലോ
എന്തിനെന്നെ കൊന്നു കെട്ടിത്തൂക്കിയെന്ന്
കണി വെള്ളരികൾ ചോദിച്ചില്ലല്ലോ
മുലകുടി മാറാത്ത എൻ്റെ കഞ്ഞുങ്ങളെ
പറിച്ചെടുത്തതെന്തിനെന്നു
വരിക്കപ്ലാവു ചോദിച്ചില്ലല്ലോ
എന്തിനെൻ്റെ കൈ വെട്ടിയെന്ന്
മുരിങ്ങാമരം ചോദിച്ചില്ലല്ലോ

ചെടികൾക്ക്‌ ജീവനുണ്ടെന്ന്
എനിക്കറിയാം
കാരണം
ഞാൻ ഭാരതീയനാണ്
എനിക്കിപ്പോൾ സങ്കടങ്ങളില്ല
കാരണം ഞാൻ സസ്യഭുക്കാണ്
പക്ഷേ
എനിക്കിപ്പോൾ
സിംഹത്തെ പോലെ
പല്ലും നഖവും വളർന്നിരിക്കുന്നു
എന്നാലും എനിക്ക് സങ്കടമില്ല
കാരണം ഞാൻ സസ്യ ഭുക്കാണല്ലോ!
-മുനീർ അഗ്രഗാമി