തേൻതുള്ളിക്കവിതകൾ 99.വറ്റുന്നു

വാടിവീണ ചിരികൾ
വസന്തമായവൾക്ക്
കണ്ണീരു‐പോലും 
പൊള്ളി വറ്റുന്നു

തേൻതുള്ളിക്കവിതകൾ 98.ഗ്രാമം

വികസനം വരുംവഴി നോക്കി
നോക്കി നിൽക്കെ
അപ്രത്യക്ഷയായൊരു
മഞ്ഞുതുള്ളിയാണെൻ ഗ്രാമം

നിറയുന്നു ..................

പുഴ അയാൾക്കുമുന്നിൽ
വാക്കുകളില്ലാതെ കിടക്കുന്നു
അയാൾ 
ഏതോ വേദനയിൽ
അവളെ നോക്കി നോക്കി നിറയുന്നു
ഇപ്പോൾ
നിറഞ്ഞു നില്ക്കുന്ന രണ്ടു കണ്ണുകളിൽ
വറ്റിപ്പോയ ഓർമ്മകൾ.

തേൻതുള്ളിക്കവിതകൾ 97.ജീവാമൃതം

തോരുവാൻ വ െയ്യന്നു നീ
ഹാ പെ െയ്യന്നു ഞാൻ!
തോർച്ചയുടെ ശാന്തിയില്ലെങ്കിലും
പെയ്ത്തിന്റെ സംഗീതം
 നമുക്കു ജീവാമൃതം

എന്റെ കാക്കേ

എന്നാലും എന്റെ കാക്കേ
വെളുക്കുമ്പോൾ
കറുപ്പായ്
കറുക്കുവോളം നീ പറക്കുന്നു

പറക്കാനറിയാതെ ഞങ്ങൾ
വെളുക്കുമ്പോൾ
ഉടലിനകത്തും പുറത്തും
കറുപ്പുമായ് നടക്കുന്നു

എന്നാലുമെന്റെ കാക്കേ
നടന്നാലും പറന്നാലും
കറുപ്പ്
നിനക്കെന്നും കറുപ്പുതന്നെ

എത്ര കറുപ്പായാലും
കുറെ നടന്നാൽ കറുപ്പെല്ലാം
വെളുക്കുന്നു ഞങ്ങൾക്ക്

അല്ല
വെളുക്കുവോളം നടക്കുന്നു
ഞങ്ങൾ

തേൻതുള്ളിക്കവിതകൾ 96.മഹായുദ്ധമാണ്

മരണം മഹാരണമാണ്
ജീവിതവും ജീവനും തമ്മിലുള്ള
 പോരാട്ടമാണ്
ഇരുപക്ഷവും ബാക്കിയാവാത്ത
മഹായുദ്ധമാണ്

മരണവീട്

മരണവീട് 
ഓർമ്മയുടെ ചിറകുള്ള പക്ഷിയാണ്
മരിച്ചയാളുടെ വേദനകളെല്ലാം തിന്ന്
അത് ചിറകൊതുക്കിയിരിക്കുന്നു
വന്നവർ വന്നവർ
ഓരോ തൂവൽ കൊണ്ടു പോകുന്നു
അത് അയാളെ ചിറകിനടിയിൽ
ഒളിപ്പിച്ച്
സങ്കടത്തോടെയിരിക്കുന്നു
ഇനി അതിന്റെ ചിറകടിയിലാണ്
അയാൾ ജീവിക്കുക
അതിന്റെ ശബ്ദത്തിലാണ്
അയാൾ സംസാരിക്കുക
ഇനി എല്ലാവരും പിരിഞ്ഞുപോയാൽ
അതു പറന്നു പോകുമോ?
വീടു മാത്രം ബാക്കിയാകുമോ?

തേൻതുള്ളിക്കവിതകൾ 95.പിണക്കം

പിണക്കം മരണമാണ്
ഇണക്കം പുനർജൻമവും
നീ എന്നിലും ഞാൻ നിന്നിലും
ജീവിക്കുമ്പോൾ

മഹാമനസ്വിനീ!

വേദനകൾ 
വേട്ടയാടും കാട്ടിൽ
ഞാനലയുമ്പോൾ
കാട്ടുതീയും പിന്നാലെ വരുന്നു
നീയേതു ദുഷ്ഷന്തന്റെ
 ശകുന്തളയെന്നെനിക്കറിയില്ലയെങ്കിലും
നീതന്നെയെനിക്കു മഴയുമഭയവും
മഹാമനസ്വിനീ!

ഓടിത്തളർന്നു വരളുമ്പോൾ

പോകണം നമുക്കൊരുവട്ടം കൂടി
പണ്ടുപഠിച്ചൊരാ സ്കൂളിൽ
ഓർമ്മകൾ വറ്റിവരണ്ട മനസ്സുമായ്
ഓടിത്തളർന്നു വരളുമ്പോൾ

പൊട്ടിപ്പൊളിഞ്ഞു വീഴാറായ്
പഴയ കെട്ടിടമെങ്കിലും
നമുക്കതിന്നടുത്തിത്തിരി നേരമിരിക്കണം
നൻമ നമ്മിൽ വർഷിച്ച പരുക്കൻ ഭിത്തികൾ കാണണം

നമുക്കു മാമ്പഴം തന്ന ക്ലാസ്മുറി
നമുക്കു മാമ്പഴക്കാലം തന്ന മാവിൻചോട്ടിലെ കളിസ്ഥലം
നമ്മെ തിരിച്ചറിയും നാമേതിരുട്ടിൽ
തപ്പിത്തടഞ്ഞു ചെന്നെത്തിലും

ലോകവേഗങ്ങളിൽ ഞാനും നീയും
കരിഞ്ഞുണങ്ങിയ പുഴയായ്
ഒഴുക്കു നിലച്ചു പിടഞ്ഞു കളിക്കെ
മരുന്നായെത്തുമോർമ്മകളെവിടെ?

അതുകൊണ്ടു പോകണം നമുക്കു കൂട്ടുകാരാ
കോമ്പസ്സുകൊണ്ടു മരത്തിലും കല്ലിലും
നാം കൊത്തിവെച്ച കുട്ടിക്കാലത്തിന്റെ
ചിത്രകഥകൾ വായിക്കുവാൻ
മഷിതീരുവോളം ബെഞ്ചിൽ നിഗൂഢമാം

 സ്മിതത്തോടെ‐അന്നോളം മിണ്ടാത്തവളുടെ പേരെഴുതിയ
പ്രണയകൗതുകം നെഞ്ചേറ്റുവാൻ

എത്ര വറ്റിവരണ്ടാലും എത്ര ചുക്കിച്ചുളിഞ്ഞാലും
പണ്ടു പഠിച്ചതിന്നോർമ്മത്തുമ്പികൾ പാറും
സ്കൂൾ മുറ്റത്തെത്തിയാൽ
താനേ നിറഞ്ഞു കവിയുന്നു നാം
താനേ വരാന്തയിൽ
താഴ്മയോടൊരു കുട്ടിയായ്
ചുളിവും നരയും മറന്ന്
ചുറുചുറുക്കുള്ള ചുവടുകൾ വെക്കുന്നു.....

തേൻതുള്ളിക്കവിതകൾ 94.ജലജീവിയായ്

കണ്ണിൽ കടലുള്ളവളിൽ
നീന്തി 
കരപറ്റാനാശിക്കെ ഞാൻ
ജലജീവിയായ് പരിണമിക്കുന്നു

തേൻതുള്ളിക്കവിതകൾ 93.കരിയിലത്തുള്ളികൾ

വേനൽമഴ കൊണ്ടുപോകുന്നു
വെയിൽ തട്ടിക്കളിച്ച വേദനകൾ;
ഉതിർന്നുപോയ കരിയിലത്തുള്ളികൾ

തേൻതുള്ളിക്കവിതകൾ 92.അഹങ്കാരി

അഹങ്കാരിയാം ഞാൻ
പാരച്ചൂട്ടിലിറങ്ങുമ്പോൾ
മണ്ണിൽ നിന്നും നോക്കി
ചിരിക്കയാണപ്പൂപ്പൻ താടി!

വിശപ്പ്

വിശപ്പാണു നാം
തീരാത്ത വിശപ്പ്
പലതരം വിശപ്പ്
പലനിറം വിശപ്പ്

ഒരപ്പത്തിനോ
ഒമ്പതിനായിരം
അപ്പത്തിനോ
ഭൂമിയെ മുഴുവനായ്
വിഴുങ്ങിയാലോ
തീരാത്തത്ര വിശപ്പ്

ചന്ദ്രനെ ഞാവൽ പഴം പോലെ
രുചിക്കുവാൻ
നാക്കു നീട്ടും വിശപ്പ്
ചൊവ്വയെ കോഴിക്കാലുപോലെ
കടിക്കുവാൻ
കൈനീട്ടും വിശപ്പ്

യേശുവേ
അഞ്ചപ്പം ഒരാൾക്കുപോലും
തികയുന്നില്ല
ആഞ്ജനേയാ
സൂര്യനെ തിന്നുവാൻ
ഓരോ നിമിഷവും ചാട്ടം തന്നെ

പ്രവാചകാ
എത്ര കഴിച്ചിട്ടും
വയർ നിറയുന്നില്ല
അയൽവാസിയുടെ പട്ടിണി മാറ്റുവാൻ
ഒരരിമണിപോലുമില്ല

തഥാഗതാ
ഭിക്ഷയാചിക്കുവാൻ
കൈനീട്ടി വിശന്നു മരിച്ചവരുടെ
ഓർമ്മകൾ തിന്നിട്ടും
മതിയാകുന്നില്ല

വിശപ്പാണുനാം
കെൂടും വിശപ്പ്
ഒരുരുളയായ് ഭൂമിയും
ഉപ്പേരിയായ് നക്ഷത്രങ്ങളും
കറിയായ് മഴയും
കഴിക്കട്ടെ
വിശപ്പടക്കട്ടെ!

നിലാവിന്റെ ഭാഷ

എനിക്കും നിലാവിനും
മാത്രമറിയുന്ന ഒരു ഭാഷയുണ്ട്
ഓരോ രാത്രിയും
ആ ഭാഷയിൽ
എന്റെ കണ്ണീർത്തുള്ളിയിൽ
എഴുതുന്നത്
നിലാവിനു മാത്രമേ മനസ്സിലാകൂ

സൂര്യനാ ഭാഷയറിയില്ല
സൂര്യൻ ഓരോപുലരിയിലും
വെളിച്ചമൊഴിച്ച് കുളിപ്പിച്ച്
എന്നെ ഒരു പൂച്ചെടിയാക്കി
നിങ്ങൾക്കു മുന്നിൽ വെയ്ക്കും

നിങ്ങൾ രസിക്കും;
പൂക്കളെല്ലാം നിങ്ങൾ കൊണ്ടുപോകുമ്പോഴും
എന്റെവേരുകൾ
ആ കണ്ണീർത്തുള്ളിയിലെ അക്ഷരങ്ങളിൽ
മുറുകെ പിടിക്കും

എന്തുവേണമെങ്കിലും
കൊണ്ടു പോകുക
എനിക്ക് നിലാവിന്റെ കൂട്ടുണ്ട്
എനിക്കും നിലാവിനുമൊരു
ഭാഷയുണ്ട്

തേൻ തുള്ളിക്കവിതകൾ 91.ചിരിക്കുന്നു

പെരുവഴിയിൽ നഗ്നയായ്‌
മരം മാനം നോക്കി നില്ക്കെ 
വെയിൽ വീണുരുണ്ട് ചിരിക്കുന്നു

വെളിച്ചം കുടിച്ചു പുലരുവാൻ

പുലരും നമുക്കൊരു പുലരി,
കിളിയൊച്ചയിലൂഞ്ഞാലാടുവാൻ
പുൽത്തുമ്പിലെ തൂമഞ്ഞു തുള്ളിപോൽ
വെളിച്ചം കുടിച്ചു പുലരുവാൻ

തേൻതുള്ളിക്കവിതകൾ 90.മഴ മഴയായ്

വേനൽ വേദനിപ്പിക്കുന്നു;
കാറ്റിന്റെ നെഞ്ചിൽ
വീണു കിടന്നു
പെയ്യുന്നു മഴ മഴയായ്!

മുറം

വീട്ടിലിപ്പോൾ മുറമില്ല
ചേറലും ചേറിപ്പെറുക്കലും
ഞങ്ങൾ മറന്നു

വിരലിന്റെ താളത്തിൽ
കല്ലും നെല്ലും വേർതിരിച്ചത്
ഞങ്ങൾക്ക് പഴങ്കഥയായി
മകൾക്കത് മനസ്സിലാകാത്ത
കടങ്കഥയായി

അതുകൊണ്ട്
അവൾ ആനയെ കണ്ടു
മുറംപോൽ ചെവിയുള്ള
ആനയെ കണ്ടില്ല
അവൾ ചോറു തിന്നു
നെല്ലിൽ നിന്നും ചോറിലേക്കുള്ള വഴി
നടന്നില്ല

മുറം ഒരു ഉപകരണം മാത്രമല്ല
അമ്മ മകളിലേക്കു പകരുന്ന
അരിയിൽ നിന്നും കല്ലെടുക്കുന്നതിന്റെ
സംഗീതം കൂടിയാണത്.

തേൻതുള്ളിക്കവിതകൾ 89.തുഴഞ്ഞു തുഴഞ്ഞു ഞാൻ!

വീഴുന്നതുപോലുമറിയാതെ
നീയെന്ന കാറ്റിൽ തൂവലായ്
തുഴഞ്ഞു തുഴഞ്ഞു ഞാൻ!

തേൻതുള്ളിക്കവിതകൾ 88.അത്യഗാധമാം...

അത്യുന്നതങ്ങളിൽ നിന്നും
വീഴാതെയില്ല ,

അത്യഗാധമാം
കടലാഴത്തിലൊരു തുള്ളിയും

നിഴലുകൾ ചവിട്ടാതെ

അപ്പോൾ നിലാവ്
ഒരു ദേവത.
നിഴലുകൾ ചവിട്ടാതെ
അയാളിലേക്ക്
നടന്നു വരുന്ന വെൺമ

അപ്പോൾ,
രാത്രിപോലും അയാളെ
ഒറ്റപ്പെടുത്തുമ്പോൾ
അവൾക്കെങ്ങനെ
അയാളെ കാണാതിരിക്കാനാകും!

ഞൊടിയിടയിൽ

കരം കവിഞ്ഞുപോകുന്ന
മഴയും മനസ്സും
കരകവിഞ്ഞുപോകാൻ
ഞൊടിയിടയിൽ
നാമൊരു പുഴയാകും

ചിറകുകളുള്ള ഇഴജീവി

കാത്തിരിപ്പ് ചിറകുകളുള്ള
ഇഴജീവിയാണ്
പറക്കാനാകാതെ അത്
സങ്കടങ്ങളിലൂടെ ഇഴയുന്നു

ഐ സി യു ;

ഐ സി യു ;
നിരാശയ്ക്ക് മുകളിലൂടെ
പ്രതീക്ഷൾ കോർത്തുണ്ടാക്കിയ
ഒറ്റയടിപ്പാലം

തേൻതുള്ളിക്കവിതകൾ 87.വൻകരകൾ

കണ്ണീർ സമുദ്രമാകുമ്പോൾ
നാം രണ്ടു വൻകരകൾ
രണ്ടു കാലാവസ്ഥകൾ

തേൻതുള്ളിക്കവിതകൾ 86.കണ്ണുകൾ നിറയുന്നു

വസന്തം കഴിഞ്ഞതിന്റെ പിറ്റേന്ന്
ചെടി പൂക്കളെ എന്നപോലെ
ആസ്പത്രിവാർഡിലേക്ക് നോക്കി
കണ്ണുകൾ നിറയുന്നു

ചുരുക്കിക്കളഞ്ഞല്ലോ അവർ!

എന്നാലും വനിതകളേ
നിങ്ങളെ വേനലിലെ 
ഒരു ദിവസത്തിലേക്ക്‐
ചുരുക്കിക്കളഞ്ഞല്ലോ അവർ!

തേൻതുള്ളിക്കവിതകൾ 85.വനവന്യതയിലവൾ!

നഗരത്തിലായാലും
പേടിചൂടിപ്പോകും
മൃഗവിശപ്പിൻ മുന്നിലൂടവൾ
വനിതയവൾ; എന്നും
വനവന്യതയിലവൾ!

*******************വേനലിൽ 'രമണൻ 'വായിക്കുമ്പോൾ ***************

വേനലിൽ രമണൻ വായിക്കുമ്പോൾ
മനസ്സിന്റെ താഴ്വരയിലൂടെ
രണ്ടാട്ടിടയൻമാർ 
സ്വപ്നങ്ങളെ
തെളിച്ചുകൊണ്ടു പോകും

ഹൃദയത്തിന്റെ
വരണ്ട മേച്ചിൽപ്പുറങ്ങളിലൂടെ
സ്കൂളിൽനിന്നും മടങ്ങിവരുന്ന
ഒരു കുട്ടി
അവരെ
ഇരട്ടപ്പേരു വിളിക്കും

രമണനെ മലയാളമേയെന്നും
മദനനെ കവിതേയെന്നും വിളിച്ച്
അവനോടും
അവരും അവന്റെ പിന്നാലെ ഓടും
അവരവന്റെ മനസ്സിലൂടെയുടൻ
വാക്കുകളേയും താളങ്ങളേയും
മേച്ചു നടക്കും
വംശനാശം വന്ന ആയർകുലത്തിന്റെ
ഓടക്കുഴൽ
‐അവരകന്നുപോകുമ്പോൾ
അവിടെ ബാക്കിയാകും

അതിലൂടെ കടന്നുപോകുന്ന നിശ്വാസം അവനു ജീവസംഗീതമാകും

വേനലിൽ
രമണൻ വായിക്കുമ്പോൾ
പൊള്ളിയ മണ്ണും മരങ്ങളും
കരിഞ്ഞ ഇലകളും പുഴകളും
യൗവനം ഓർത്തു ചിരിക്കുന്ന
വൃദ്ധരെപോലെ
വൃദ്ധിയുടെ
ഓർമ്മകളിൽ നിറഞ്ഞ് മഴക്കാലമാകും

ഓരോ വാക്കുമന്നേരം
പൂത്തുലഞ്ഞ്
ഉടലുമുയിരും പൂക്കാലമാക്കും
സംഗീതം മറന്നുപോയതിനാൽ
പാടാനാവാതെ വരണ്ടുപോയ
ചലനങ്ങൾ
അരുവികൾ മനോഹരമായി പാടിക്കേൾപ്പിക്കും

വേനലിൽ രമണൻ വായിക്കുമ്പോൾ
രമണനും മദനനും
പച്ചപ്പിന്റെ ഇടയൻമാരാകും
അവർ തെളിച്ചു കൊണ്ടുവരുന്ന പച്ചപ്പിന്റെ പാൽകുടിച്ച്
കൊടും വേനലേ കുറുമ്പുകാട്ടല്ലേ
കളിക്കല്ലേയെന്ന് നാം പറഞ്ഞു പോകും

വേനലിൽ രമണൻ വായിക്കുമ്പോൾ
പകലും രാവും
കുളിർചന്ദ്രിക നമുക്കു കാവലിരിക്കും

വേനൽമഴ

തേൻതുള്ളിക്കവിതകൾ
84.
കരിഞ്ഞുണങ്ങും മുമ്പേ
മാനത്തിരുന്നു നീ
മഴത്തുള്ളിയിൽ വെച്ചു 
കൊടുത്തയയ്ക്കുന്ന
 കുളിർസേ്നഹമാണു വേനൽമഴ

ചിരിക്കുന്നു

വയലാറു പോയി
വയലുമാറും പോയി

ചങ്ങമ്പുഴ പോയി
ചങ്ങാടവും പുഴയും പോയി

എന്നിട്ടും വേനൽപ്പല്ലുകാട്ടി
കാലം ബാക്കിയായവയെ
വിളിച്ചു ചിരിക്കുന്നു

തേൻതുള്ളിക്കവിതകൾ 82.തോർന്നുപോയ്!

എന്നിൽ നീയെന്നപോലിടയ്ക്കൊരു
പെരുമഴ വേനലിൻ നെഞ്ചിൽ
പെയ്തു തോർന്നുപോയ്!

ഇന്ത്യയുടെ മകൾ *****************

ഇന്ത്യയുടെ മകൾ
ഇന്ത്യയിലെ എല്ലാ വീടിന്റെയും
വളർത്തു പുത്രിയാണ് 
പുറത്തിറങ്ങുമ്പോൾ
കണ്പോള തുറന്ന്
വീടവൾ വരുന്നതും കാത്തിരിക്കും

പകൽ സ്വർഗ്ഗവും
രാത്രി നരകവുമായ അമ്മയ്ക്ക്
അവളോട് പറയുവാൻ
ഭാഷ മതിയാകുന്നില്ല

വാക്കുകളിൽ നിന്നും വാക്കുകളിലേക്ക്
പടർന്നു കയറുന്ന കാട്ടുതീ
പുരാതനമായ സംസ്കാരവും വിഴുങ്ങി
അവൾക്കുമുന്നിൽ വാ പിളർത്തുന്നു

അവളുടെ വേരുകളും ഇലകളും
തിന്നു കൊണ്ട്
അവളെ നഗ്നയാക്കി
ആ തീ തിരിച്ചു പോകുന്നു

അവൾ ഒറ്റയ്ക്ക്
വേനൽ തുഴഞ്ഞു തീരാത്ത മരമായ്
ഇന്ത്യയുടെ പൊക്കിളിൽ
കുഴഞ്ഞു വീഴുന്നു

ഓരോ വീട്ടിലും
അന്നേരം അമ്മമാരുടെ വിലാപം
അടുക്കളയിൽ കരിപിടിച്ചുണങ്ങുന്നു
പൂമുഖത്ത്
അവൾ തിരിച്ചു വരുന്നതും കാത്ത്
അവളുടെ നിശ്വാസമേറ്റു വാങ്ങിയ
ചെടികൾ പൂവിടാതെ
അവളെ കാത്തു നില്ക്കുന്നു

അവൾ സന്തോഷം കോർത്ത്
വിതറിയിരുന്ന
പകലുകളും രാത്രികളും
അവളെ തിരയുന്നു

ഇന്ത്യയുടെ മകൾ
നിലവിളിയുടെ കൈപിടിച്ച്
ആരെയോ പേടിച്ച്
കത്തിത്തീരുമ്പോൾ
തെരുവുകൾ ചുവക്കുന്നത്
ഒരു ബുദ്ധ പ്രതിമ മാത്രം
നിസ്സംഗനായി കാണുന്നു

എഴുപതാം വയസ്സിൽ

കൊഴിഞ്ഞ തൂവലുകൾ
പെറുക്കുവാൻ
വന്നവഴിയെ തിരിച്ചു പറക്കുവാൻ
മോഹിക്കും
പക്ഷേ ഉടലിലൊരൊറ്റത്തൂവലുമില്ലാത്തതിനാൽ
കിടന്ന കിടപ്പിൽ
വിയർപ്പുമണികൾ
ചിറകുകളാകും

പാതിമയക്കത്തിന്റെ തണലിലൂടെ
അടഞ്ഞ കണ്ണുകളുടെ
ചെരിവിലൂടെ
കുറെ നേരം പറക്കും

കൊഴിഞ്ഞ തൂവലുകൾ
പെറുക്കിക്കളിക്കുന്ന കുട്ടികൾ
ഏതൊക്കെയോ മാവിനു
കല്ലെറിയുന്നതു നോക്കി നിൽക്കും

ഒരുകല്ല് നെറ്റിയിൽ കൊണ്ടു ഞെട്ടും
നെറ്റിയിൽ നഴ്സിന്റെ കൈ
കൈയിൽ ഒരു ഗുളിക!

മക്കളിപ്പോഴും
മാവുകൾക്കു കല്ലെറിയുന്നുണ്ടാവും

പാവം മനസ്സ്!
മോഹിച്ച തൂവലുകൾ കിട്ടാതെ
ഉള്ളതെല്ലാം കൊഴിഞ്ഞ
ഒരിഴജീവി.

തേൻതുള്ളിക്കവിതകൾ 81.മാനും ഞാനും

മീനപ്പകലിൽ വേട്ടക്കിറങ്ങുന്നു വേനൽ‐
ചൂടമ്പേറ്റു മണ്ണേ നീ പൊടിയുന്നു
മാനും ഞാനും രക്ഷതേടിയോടി
വിയർപ്പു പുതച്ചൊളിക്കുന്നു

സ്കൂളുകളെ കുറിച്ചോ ഞാൻ ഒന്നും പറഞ്ഞിട്ടില്ല

ആ സ്ഥലം
വാക്കുകളുടെ കൊത്തേറ്റു മരിച്ച
കുട്ടികളുടെ‐ശ്മശാനമാണ്

വിഷം ചീറ്റുന്ന വാക്കുകൾ
ഒളിച്ചിരിക്കുന്ന മാളങ്ങൾ
ഓരോ മണിക്കൂറിലും
അവർക്കു മുന്നിൽ തുറക്കുന്നു

അവിടെ നിന്നും
ഒഴുകിപ്പരക്കുന്ന വിഷം
അവിടെ വേരിറക്കിയ പച്ചക്കറിയിൽ കയറുന്നു
പിന്നെ പഴങ്ങളിൽ കയറുന്നു
ധാന്യങ്ങളിൽ കയറുന്നു

വാക്കുകളിൽ നിന്നും വഴുതിപ്പോയവരെ
ജീവിച്ചിരിക്കുന്നവരെ
ചീരയുടെ ഇലകൊണ്ട്
അതു കൊത്തുന്നു

ഇല്ല
ക്ലാസ്സ്റൂമിനെ കുറിച്ചോ
കാർഷിക സർവ്വകലാശാലയെ
കുറിച്ചോ കോളേജുകളെ കുറിച്ചോ
സ്കൂളുകളെ കുറിച്ചോ
ഞാൻ ഒന്നും പറഞ്ഞിട്ടില്ല

തേൻതുള്ളിക്കവിതകൾ 80.വെറുമൊരു പൊട്ടല്ല

ഓർമ്മയിലെ‐വളപ്പൊട്ട് 
വെറുമൊരു പൊട്ടല്ല
വലിയ ഒരു പൊട്ടലിന്റെ
നെറ്റിയിലെ പൊട്ടാണ്

പൂമൊഴി

ഒരപ്പൂപ്പൻതാടി 
പറന്നുപറന്നു വന്നു
ആരുടേയോ കുട്ടിക്കാലത്തിൽ നിന്നും‐
പിണങ്ങി വന്നതാണ്
ഐഡറ്റി കാർഡില്ലാത്തതിനാൽ
കുട്ടികൾക്ക്‐മനസ്സിലാവാത്തതിനാൽ
സങ്കടം കൊണ്ട് വിറച്ച്
കാറ്റിന്റെ കൈപിടിച്ച് മെല്ലെ
ഒഴുകിപ്പോന്നതാണ്
മുറ്റത്തിന്റെ അതിരിൽ
ഇന്നലെ കെട്ടിയ വേലിയിൽ
അതെന്നെ നോക്കി നിൽക്കുന്നു
തടഞ്ഞില്ലായിരുന്നെങ്കിൽ‐അതെന്റെ‐
ഇതളിൽ വന്നിരുന്നേനെ!

ആദർശം

ഒരാദർശം 
പശുവിന്റെ കഴുത്തിൽ കയറു കെട്ടും 
മറ്റൊരാദർശം
ആ കയറഴിച്ച് മനുഷ്യന്റെ കഴുത്തിൽ കെട്ടും
മറ്റൊരാദർശം
പശുവിനു മാലയിടും
മറ്റൊരാദർശം
ആ മാലയഴിച്ച് മനുഷ്യന്റെ കഴുത്തിലിടും
മറ്റൊരാദർശം
ആ മാലയഴിച്ച് കല്ലിൽ വെക്കും
മറ്റൊരാദർശം
പശുവിനെയും മനുഷ്യനെയും
കൂട്ടിക്കെട്ടും
ആദർശം അങ്ങനെയാണ്
അത് ചിലപ്പോൾ
മനുഷ്യനെ മനുഷ്യനായും
മനുഷ്യനെ മനുഷ്യനല്ലാതെയും
കയറിനെ കയറാല്ലാതെയും
കയറിനെ കയറായും ....

തേൻതുള്ളിക്കവിതകൾ 79.കാട്ടിലൂടെ അതൊഴുകുമ്പോൾ.

പേടിയുടെ 
ഒരു കൈവഴി
പേടമാനാണ് .
കാട്ടിലൂടെ
അതൊഴുകുമ്പോൾ.

തേൻതുള്ളിക്കവിതകൾ 78. തെളിയുന്നു

സ്വാതന്ത്ര്യമാഘോഷിക്കുമ്പോഴും
കയ്യിലെ അദൃശ്യ വിലങ്ങ്
ഭക്ഷണത്തിൽ തെളിയുന്നു

കൊമ്പ്.

രാജവാഴ്ച അവസാനിച്ചാലും
തിരഞ്ഞെടുത്ത പ്രതിനിധിയെ
സിംഹാസനത്തിലിരുത്തിയാൽ
അയാൾ രാജാവാകും
സിംഹാസനത്തിലിരുന്നാൽ
അയാൾക്ക് കൊമ്പു മുളയ്ക്കും
ഫാസിസത്തിന്റെ
കൂർത്ത കൊമ്പ്.

തേൻതുള്ളിക്കവിതകൾ 77.മധുതേടിയലഞ്ഞവർ

വിരൽ തൊട്ടപ്പോൾ 
വിരിഞ്ഞ പൂവിൽ 
മയങ്ങിവീഴുന്നു
മധുതേടിയലഞ്ഞവർ

തേൻതുള്ളിക്കവിതകൾ 76.നേരേ

നേരം വെളുക്കും
നേരെ വെളുക്കും
നേരമേ വെളുക്കൂ
നേരേ വെളുക്കൂ

ജലജന്മം (പ്രണയകവിത)

ഇത്ര ആഴത്തിൽ
തണുത്തിരിക്കുമ്പോൾ
എന്റെ ആകാശമേ
എന്റെ സ്വാതന്ത്ര്യമേ
നിന്റടുത്തേക്കു പറക്കുവാൻ
നിന്നിൽ പറന്ന്
എന്റെ അപരജീവിതം നയിക്കുവാൻ
ഞാനെത്ര വെയിലു കൊള്ളണം!

അദൃശ്യമായ
ചിറകുകൾ ലഭിക്കാനുള്ള
തപസ്സാണ്
ഓരോ വിങ്ങലും വേവലും

ഇറ്റിവീണും ഒലിച്ചും
തളം കെട്ടിയും
ആഴത്തിലാഴത്തിൽ
വേദനയായ്
മരവിച്ചു തുടങ്ങുമെൻ
ജലജൻമം
വെറുതേ മോഹിക്കുന്നു

തേൻതുള്ളിക്കവിതകൾ 75.എല്ലാം അവളൊഴുക്കിക്കളയും

അവളുടെ മഴക്കാലം തുടങ്ങി
ഇനി ഞാൻ എത്ര ചൂടായിട്ടും
കാര്യമില്ല
എല്ലാം അവളൊഴുക്കിക്കളയും

ആസ്പത്രി

ആസ്പത്രി 
നമ്മുടെ കോട്ടയാണ്
വേദനകളുടെ പുറത്തു കയറി
 മുന്നേറുന്ന മരുന്നുകളാണു
 പടയാളികൾ

തേൻതുള്ളിക്കവിതകൾ 74.ഒറ്റയാവുന്നു നാം

ഒക്കത്തിരുന്നു
വളർന്നാലും
ഒറ്റയാവുന്നു
നാം നമ്മളിൽ!

കൊത്തങ്കല്ല്

തുമ്പിയെപോലെ പാറിനടന്ന്
തുമ്പികളറിയാതെ
കല്ലുകളെടുത്തു കളിച്ചൂ നാം

മുന്നിൽ കല്ലുകൾ വിതറി
കൈയൊരു കിളിയായ്
ചിറകു വിരിച്ചു
പറക്കും കല്ലുകൾ ചിറകിലെടുത്തൂ
താഴെപ്പോയവ കൊക്കിൽ
കൊത്തിയൊതുക്കീ

കല്ലുകളഞ്ചും നമ്മെപ്പോൽ
മണ്ണിൻ മാറിലുരഞ്ഞും
സ്നേഹം തട്ടിയും
മിനുത്തു തുടുത്തവ

കല്ലുകളെങ്ങനെ കളിയായ്
ജീവിതവിരലിലൊതുക്കാമെന്നു
പഠിപ്പിച്ചവ
നമ്മുടെ കൊക്കിലൊതുങ്ങിയ
കൊത്തങ്കല്ലുകൾ