തണുപ്പുകാലത്തെ ചുംബനം

തണുപ്പുകാലത്തെ ചുംബനം
വരണ്ടപാടം  

ആദ്യത്തെ നീർത്തുള്ളി
വലിച്ചുകുടിക്കും പോലെ
അത്രമേലാഴത്തിലെത്താതെ
വിണ്ടുകീറിയ പാടുകളിൽ
വീണു മടങ്ങുന്നു.

കുഞ്ഞിക്കവിത

മുലപ്പാലിൽ ഒരു പാലമുണ്ട്
മാതൃത്വമതുവഴി കുഞ്ഞിലെത്തും
പാലം കാണുന്നവളതുവഴി നടക്കും
കാണാത്തവൾ കുഞ്ഞിലെത്തില്ല

പടരലിന്റേയും പകരലിന്റേയും വ്യാകരണം

എന്റെ  ആകാശത്തിലേക്ക്
നീണ്ടുവന്ന നിന്റെ  ചില്ലകൾ
അവർ മുറിച്ചു കളഞ്ഞു .

അവർക്ക് 

 എന്നത്തേയും പോലെ  

അച്ഛന്റേയും അമ്മയുടെയും
അമ്മാവൻ മാരുടെയും 

 കൈകളുണ്ടായിരുന്നു

നീ വീണ്ടും   

എന്റെ  ആകാശം മുഴുവനും പടർന്നു
യുദ്ധവിമാനങ്ങൾ വന്നു , 

വെടിയുണ്ടകൾ വന്നു

അവ നമുക്കുമുകളിലോ  

താഴെയോ എന്ന്  

നാം നോക്കിയില്ല .

പടരലിന്റേയും പകരലിന്റേയും വ്യാകരണം  

തെറ്റിക്കുകയായിരുന്നു നാം

വന്യരതി

വന്യരതി

ഇവിടെ ഞാൻ വസിക്കുന്നു

മഴ ആസ്വിക്കാതെ
കടൽ നീലിമ കാണാതെ
കാറ്റിനെപേ ടിച്ച് .

നമ്മെ പട്ടിണിക്കിട്ട്
വീടിരുന്നിടം കടൽ
തിന്നുകയായിരുന്നു

തിരയുടെശക്തിയുമ്മാസക്തിയും
വന്യരതിയായിരുന്നു

കടൽ വലവീശുകയായിരുന്നു

കരമീനുകൾ വലയിലാവുകയായിരുന്നു

കടലിന്റെ  ചാകര
നമുക്കു കണ്ണീർക്കടൽ

വലിയ നിലവിളികൾ

വലിയ നിലവിളികൾ 

വലിയ നിലവിളികൾ
വലിയ ഒച്ചയിൽ
മുകളിലൂടെ കടന്നുപോകുന്ന
ആകാശപ്പറവകളല്ലാതെ
മറ്റൊന്നുമല്ല

ആ പഴയ ചെന്നായ
അവയുടെ പിന്നിൽ മറഞ്ഞിരിക്കുന്നു
മുന്തിരി കിട്ടാതെ മടങ്ങിയ കുറുക്കൻ
അവ ആഘോഷിക്കുന്നു

എന്നാൽ ചെറിയ നിലവിളികൾ
ഒച്ചപൊന്താതെ  

മണ്ണിൽ വേരുകളിറക്കുന്നു
അവശേഷിക്കുന്ന ശുദ്ധജലം
അവരുടെ കണ്ണിൽ നിന്നിറങ്ങി വരുന്നു

നീതിയുടെയും നിലനിൽപ്പിന്റേയും
ചിറകുകളിൽ അവ ഭൂമിവിടാതെ
പറക്കാൻ ശ്രമിക്കുന്നു

ചെറിയ നിലവിളികൾ ചേർത്തുവെച്ചാലേ
എല്ലാ പ്രകടനങ്ങളുടെയും
പ്രഹസനങ്ങളുടെയും കറുത്ത കുപ്പായം
വലിച്ചു കീറാൻ പറ്റൂ

ചെറിയ നിലവിളികൾ
കല്ലുപ്പിനെക്കുറിച്ചും  

ഉറിയെക്കുറിച്ചും
ഊഞ്ഞാലിനെക്കുറിച്ചും
ഉണക്കലരിയെക്കുറിച്ചുമാവാം

ചെറുതായൊരു തേങ്ങൽ കേട്ടാൽ മതി
അതെടുത്തു  വെക്കുക
നാളെയുടെ കുഞ്ഞു വിരലുകൾ
അതുപിടിച്ചാവും നടക്കുക